2025, profisionál saúde atende pasiente 193.929 iha ospitál sira
DILI, 25 Marsu 2026 (TATOLI)—Diretór Jerál Servisu Ospitalár Interinu iha Ministériu Saúde, Delfim Ferreira, hateten iha tinan 2025 pasiente hamutuk 193.929 mak profisionál saúde atende ona iha kada ospitál sira iha Timor-Leste.
“Husi pasiente sira-ne’ebé moras maioria hela iha kada ospital sira-ne’e bele haree sira-nia durasaun baixa ne’e porvolta 203,59, nia mediu katak kama ida bele atende ema na’in-neen, balun tama dadeer-meudia depois kalan alta iha pasiente seluk okupa fila-fali,” Delfim Ferreira hateten iha konferénsia imprensa iha Kaikoli, ohin.
Pasiente ne’ebé mak tama mai ospital ne’e balun mós lakon vida tanba iha gravidade moras, tanba iha taxa mortalidade ne’ebé mak relata iha 2025 ne’e hamutuk pasiente 1.922.
Maibé, nia dehan, refere ba padraun Organizasaun Mundiál saúde (OMS) hatudu katakTimor-Leste presiza hatun numeru moras iha kada loron no kada fulan no kada tinan, atu nune’e pasiente sira labele lakon vida iha tempu atendimentu nian.
Nia informa, fatór ne’ebé mak kontribui ba moras mak banhira pasiente ida moras grave mak mai ospitál no balun ne’e antes asesu ba fasilidade saúde dook, maibé sira iha opsaun balun ba halo tratamentu tradisionál.
“Tanba ne’e enkoraja ba públiku, favór ita hotu buka solusaun ba familia sira-ne’ebé mak moras atu foti desizaun lalais, labele husik sira sofre iha uma no laiha membru família balun ne’ebé mak preokupa,” nia dehan.
Nia hateten, ikus-ikus ne’e populasaun sira preokupa kona-ba ospitál sira, tanba ne’e MS harii ospitál lima hanesan Opsital Nasional Guido Valadares, Ospital Referal Baukau, Maubisse, Suai, Maliana no RAEOA.
“Iha tinan 2025, ita-nia atendimentu kada loron, ita bele dehan iha melloramentu ne’e reflete ita-nia relatóriu 2025. Dahuluk, ita haree husi kondiasaun kama sira-ne’ebé iha ospitál referál Baukau hamutuk 75, ospitál referal Maliana ne’e kama hamutuk 24, ospitál referál Suai kama hamutuk 24, HNGV kama hamutuk 359, ospitál referál Maubisse kama hamutuk 24 no ospitál RAEOA kama 24. Total kama ne’ebé mak disponivel atu atende komunidade banhira baixa, ita bele dehan númeru hamtuk 530. Ida-ne’e reserva banhira iha aumenta pasiente iha situasaun balun,” nia dehan.
Jornalista : Felicidade Ximenes
Editór : Cancio Ximenes
