KOVALIMA , 25 Marsu 2026 (TATOLI)-Vise Prezidente Autoridade Nasionál Petróliu (ANP), Quintino Perreira, hateten Empreza Internasionál Timor Resources, Kuarta ne’e, halo ona indeminizasaun ba família afetadu projetu konfirmasaun perfurasaun feto kmaus II iha aldeia Tabakolot, suku Debos, postu administrativu Suai, Kovalima.
“Ami hamutuk ho Timor Resources hala’o ona pagamentu ba família afetadu ba projetu konfirmasaun perfurasaun mina Feto Kmaus II iha munisípiu Kovalima,”nia hato’o asuntu ne’e iha ninia diskursu iha Salaun Administrasaun Muníspiu Kovalima, ohin.
Notísia Relevante :Timor Resources diálogu ho komunidade afetada ba perfurasaun posu Feto Kmaus
Nia dehan, antes tama iha prosesu pagamentu ohin loron nian, ekipa tékniku hosi Autoridade Nasionál Petróliu maka fasilita Empreza Timor Resources hodi verifika dadus husi komunidade afetadu ba projetu referidu.
Tuir dadús husi ANP no Timor Resources kona-ba komunidade afetadu projetu ne’e hamutuk uma-kain hitu (7), ho totál rai ninia luan maka 10.230 metru kuadradu.
“Família afetadu ba projetu konfirmasaun perfurasaun feto kmaus II hamutuk na’in-hitu ho orsamentu $ 46,865.60,” nia relata.
Iha fatin hanesan Prezidente Autoridade Munisípiu Kovalima, Miguel Armada Cardoso, informa Empreza Timor Resources fasilita husi ANP ohin halo ona pagamentu ba família afetadu projetu konfirmasaun perfurasaun mina feto kmaus II iha Kovalima.
“Ohin loron finál ona ba prosesu tomak hodi halo indeminizasaun ba família afetadu ba projetu konfirmasaun perfurasaun mina feto kmaus II iha Kovalima no orsamentu transfere ona ba ita boot sira nia konta bankaria,” Autoridade Kovalima ne’e hateten.
Notísia Relevante :Timor Resources diálogu ho komunidade afetada ba perfurasaun posu Feto Kmaus
Jornalista :Celestina Teles
Editór :Florencio Miranda Ximenes
