Timor Resources diálogu ho komunidade afetada ba perfurasaun posu Feto Kmaus
COVALIMA, 11 Abríl 2024 (TATOLI) – Empreza Timor Resources halo diálogu ho komunidade afetada ba perfurasaun posu Feto Kmaus-Karau, iha suku Debos, postu Suai, hodi rona sira-nia ideia.
Jerente Timor Resources, Filomeno Andrade, informa katak iha estudu prelimináriu ne’ebé Timor Resources halo nia rezultadu teste hatudu katak mina-matan Feto Kmaus atu halo tan perfurasaun, tanba ne’e molok realiza ida ne’e presiza rona populasaun nia hanoin, nomós parte ida atu hetan dadus husi família afetada sira.
“Oinsá sira-nia hanoin kona-ba mina-matan ne’ebé estudu hatudu sei hala’o perfurasaun [posu] Feto Kmaus to’o iha Vila nia klaran. Timor Resources hasoru malu ho komunidade afetada hanesan parte ida mós atu foti dadus nune’e relata ba Autoridade Nasionál Petróleo [ANP] no bainhira autoridade sira tuun komunidade iha ona informasaun”, Filomeno Andrade hateten iha salaun Igreja Ave Maria Suai, ohin.
Nia esplika katak Timor Resources tenke halo tan perfurasaun to’o Vila, iha igreja nia oin, iha komunidade nia leet, tanba mina-matan nia lihun tolu ho nivel ketaketak to’o iha fatin ne’e.
Iha sorin seluk, abitante afeitadu Deonísio de Araújo, hatete empreza atu halo perfurasaun mina iha kedan nia uma sorin no nia prontu atu koopera. “Hanesan timoroan, atu halo dezenvolvimentu ba ita-nia nasaun, liuliu iha Covalima ita kontribui, maibé empreza tenke trata komunidade afetada ho digna”, nia sujere.
Diretór Servisu Munisipál Terra no Propriedade Covalima, Carlos Caetano, reforsa katak diálogu ne’e atu komunidade afetada ba perfurasaun mina-matan Feto Kmaus informada no bainhira ekipa halo levantamentu dadus ba sira iha ona preparasaun.
Tuir dadus Terra no propriedade Covalima, rejista parsela rai privada 38 no rai Estadu nian ualu ne’ebé tama iha área perfurasaun posu Feto Kmaus.
Lembra katak perfurasaun ba posu Karau-1/Feto-Kmaus-1 hala’o iha 25 Outubru 2021, maibé empreza australiana Timor Resources deside taka iha dezembru tinan hanesan tanba bazeia ba teste laiha valór komersiál.
Depois ida ne’e, empreza petrolífera ne’e halo preparativu hodi hakat ba perfurasaun posu foun ne’ebé lokaliza iha munisípiu referidu hodi konfirma deskoberta mina ne’e iha valór komersiál hodi halo preparativu hotu hodi bele halo perfurasaun konfirmasaun, nune’e mos peskiza ne’ebé mak sira planeia ona iha 2024.
Timor Resources sai hanesan operadór ba kontratu partilla produsaun TL-OT-17-08 no TL-OT-17-09 hamutuk ho nia parseiru Timor Gap Onshore Blocks Unip. Lda.
Notísia relevante: Empreza prepara fura posu mina iha Covalima konfirma valór komérsiu
Jornalista: Celestina Teles
Editora: Maria Auxiliadora
