iklan

NASIONÁL, EKONOMIA, HEADLINE

Empreza prepara fura posu mina iha Covalima konfirma valór komérsiu

Empreza prepara fura posu mina iha Covalima konfirma valór komérsiu

Prezidente ANP, I.P, Gualdino do Carmo da Silva. Imajen Tatoli/António Daciparu

DILI, 13 fevereiru 2024 (TATOLI)—Empreza petrolífera, Timor Resources daudaun ne’e halo hela preparativu hodi hakat ba perfurasaun posu mina foun ne’ebé lokaliza iha munisípiu Covalima, hodi konfirma deskoberta mina ne’e iha valór komérsiu.

“Hanesan públiku akompaña depois rezultadu perfurasaun iha fim tinan 2023 Autoridade Nasionál Petróleu halo tiha deklarasaun ida kona-ba deskoberta tékniku ba posu tolu (Feto Kmaus, Liurai no Lafaek) ne’ebé mak lokaliza iha Suai. Hosi ne’e empreza daudaun hatama ona sira-nia planu orsamentu ba tinan ne’e, ne’ebé mós inklui perfurasaun posu atu konfirma deskoberta balun ne’ebé mak realiza hetan iha tinan kotuk,” Prezidente Autoridade Nasionál Petróleu, Institutu Públiku (ANP, I.P), Gualdino do Carmo da Silva, hateten, hafoin halo abertura ba sorumutu, ne’ebé realiza hosi ANP no Autoridade Aduaneira, iha Delta Nova, tersa ne’e.

ANP espera katak Timor Resources hamutuk ho Timor Gás no Petróleu, Empreza Públiku (Timor GAP, E.P) bele hakat tuir planu ne’ebé hato’o ona atubele halo preparativu hotu hodi bele halo perfurasaun konfirmasaun nune’e mos peskiza ne’ebé mak sira planu ona iha tinan 2024.

“Posu konfirmasaun ne’e nu’udar posu foun, iha área Suai. Posu konfirmasaun signifika posu atu konfirma estrutura ne’ebé maka antes ne’e deskoberta tiha ona ho posu seluk, katak fura uluk ona posu ida iha pasadu no konfirma iha duni petróleu no iha presaun di’ak atu prodús.  Maibé posu konfirmasaun ne’e ninia objetivu atu hatene liután ninia distribuisaun hosi petroléu ne’e rasik, hosi ne’ebá sei fó mai ita volume, hosi ne’e mak tau ba kálkulu hodi haree ninia volume ne’e ho presu petróleu prezente no liga mós ba kustu atu dezenvolve kampu ne’e rasik no rezultadu katak ita bele dezenvolve kampu ne’e ka lae, kuandu nia komérsiu viável signifika katak hetan retornu komersiál ne’e mak foin avansa ba dezenvolve kampu,” nia akresenta.

Notísia relevante : Rezultadu analiza amostra mina posu Lafaek iha Indonézia hatudu sinál pozitivu

Antes ne’e, ANP fó sai katak deskoberta posu Karau-1/Feto Kmaus-1 no posu Lafaek-1/Weda-1. Posu esplorasaun Karau-1 (ho nia naran kulturál posu Feto-Kmaus-1) nomós posu esplorasaun Lafaek-1 (ho naran kulturál Weda-1) mak sai hanesan posu ne’ebé lokaliza iha área rai maran dahuluk no datoluk ne’ebé hala’o perfurasaun iha área kontratu partilla produsaun TL-OT-17-08.

Timor Resources sai hanesan operadór ba kontratu partilla produsaun TL-OT-17-08 no TL-OT-17-09 hamutuk ho nia parseiru Timor Gap Onshore blocks Unip. Lda.

Perfurasaun ba posu Karau-1/ Feto-Kmaus-1 rasik hala’o iha loron 25 outubru 2021, enkuantu perfurasaun ba posu Lafaek-1/Weda hahú iha loron 02 outubru 2022.

Rezultadu perfurasaun ba posu rua ne’e rasik indika prezensa idrokarbonetu iha intervallu balun, ne’ebé gás ho tipu C1-C5 observa liuhosi meiu detesaun kromatográfu durante aktividade monitorizasaun ba mud logging.

Iha parte seluk, operadór mós hala’o teste ho naran drill stem test hamutuk dala-neen ba posu Karau-1/Feto-Kmaus-1 durante fulan-novembru no dezembru 2021 no Lafaek-1/Weda-1 ne’ebé hala’o iha abríl 2023. Teste sira ne’e konsege halibur amostra idrokarbonetu hosi zona oin-oin hosi posu rua ne’ebé temi ona iha leten. Informasaun detallu sobre prezensa idrokarbonetu hosi posu rua refere no aprezenta iha tabela tuir mai.

Amostra fluida idrokarbonetu (mina no gás, inklui amostra bee) hosi posu rua refere haruka ona ba laboratóriu tékniku ida iha Jakarta, Indonézia atu halo analiza fluid geochemical analysis. Rezultadu husi análiza laboratóriu ba amostra sira ne’ebé halibur hosi Karau-1/Feto-Kmaus-1 hatudu mina ho densidade kma’an (light oil), no gas condensate no amostra idrokarbonetu hosi Lafaek-1/Wedaa-1 indika mina ho densidade kma’an ho nível sulfur ne’ebé kiik (light-sweet oil) no gás tuir padraun American Petroleum Institute (API).

Artigu 7 (dd) hosi dekretu-lei númeru18/2020 loron 13 maiu kona-ba operasaun petróleu iha área rai maran define ona termu deskoberta “katak kualkér akontesimentu petróleu ne’ebé mosu iha área kontratu ida, independente hosi kuantidade, kualidade ka viabilidade komersiál, verifika ho pelumenus métodu detesaun ka avaliasaun rua “.

Bazeia ba faktu ida ne’ebé apresenta liuhosi aktividade perfurasaun iha posu Karau- 1/Feto-Kmaus-1 no Lafaek-1/Weda-1 konsidera hanesan deskoberta tékniku indika hosi evidénsia amostra fluida idrokarbonetu ne’ebé foti diretamente hosi zona respetivu no prezensa idrokarnetu C1-C5 durante aktividade monitorizasaun mud logging ba posu rua.

Daudaun estatutu ba posu rua iha hela faze suspensaun temporáriu ho posibilidade atu re-entrada iha futuru ho konsiderasaun ba importánsia atu halo teste tan no posibilidade ba planu appraisal drilling molok deklara deskobre komersiál.

Kampu Lafaek-1/ Weda-1 no Karau-1/Feto-Kmaus-1 hetan ona sertifikasaun independente hosi Energy Resource Development Pty Ltd, tuir padraun PRMS 2018. ANP rasik sei kontinua halo revizaun ba relatóriu hirak refere no sei serbisu hamutuk ho Timor Resources ho nia parseiru atu garante aktividade esplorasaun ne’ebé susesu, tuir lei aplikável iha Timor-Leste.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!