DILI, 25 Marsu 2026 (TATOLI)-Komisaun A ne’ebé Trata Asuntu Konstituisionál no Justisa hahú halo diskusaun ba kalendáriu atu diskute alterasaun Lei Eleitorál ba Parlamentu Nasionál no Lei Eleitorál Munisipál.
Prezidente Komisaun A, Natalino dos Santos, hateten reuniaun komisaun diskute kalendáriu ne’ebé iha 08 Abríl tinan ne’e hahú halo audiénsia públika no sei konvida parte Ezekutivu no entidade relevante sira hodi rona sira-nia hanoin ba projetu lei ne’e.
Nia dehan alterasaun ne’e halo ba artigu ualu iha lei vijente hodi halo armonizasaun ba lei rua ne’e no haree órgaun eleitorál tanba tinan oin sei iha eleisaun prezendiál no podér lokál.
Lembra katak reuniaun plenária Parlamentu iha loron 24 Marsu,meza anunsia no baixa ona projetu lei númeru 16/VI/(3a)-alterasaun dahaat Lei númeru 5/2006, loron 28 Dezembru, Órgaun Administrasaun Eleitorál, alterasaun dalimak lei númeru 6/2006, loron 28 Dezembru, Lei Eleitorál ba Parlamentu Nasionál no alterasaun dahuluk lei númeru 22/2021, loron 04 Novembru, Lei Eleitorál Munisipál ba Komisaun A hodi halo apresiasaun inisiál.
Lei Eleitorál mak regula eleisaun deputadu ba Parlamentu Nasionál no Lei Eleitorál Munisipál regula eleisaun Prezidente Munisípiu, Vise-Prezidente Munisípiu no deputadu asembleia munisipál.
Jornalista: Nelson de Sousa
Editora: Maria Auxiliadora
