BAUKAU, 25 Marsu 2026 (TATOLI)—Kompañia Norinco International Corporation ne’ebé responsabiliza ba projetu reabilitasaun estrada diresaun Postu Administrativu Laga no Baguia apoia normaliza ponte Gomilafa ne’ebé hetan estragu iha meiadu fulan-ne’e.
Administradór Postu Administrativu Baguia, Mário Xavier da Silva esplika inisiativa referida kompañia halo bainhira autoridade husu apoia atu normaliza ponte Gomilafa tanba úniku dalan ba movimentasaun transporte husi Baguia ho Munisípiu Baukau.
“Hadi’a ona. Transporte hahú la’o normál iha loron 17 Marsu,” Administradór Postu Baguia informa liuhusi telefónema, Kuarta ne’e.
Notísia relevante: Ponte Gomilafa iha faze dezeña
Mário Xavier relata liuhusi aprosimasaun ikus iha solusaun nune’e kompañia apoia ateru fatuk no rai tanba ponte referidu fasilita mós kompañia hala’o projetu reabilitasaun estrada Diresaun Laga bá Baguia.
Mezmu nune’e, Mário Xavier rekomenda ba Ministériu Obra Públika (MOP) atu aselera dezeñu nune’e konstrui foun tanba atuál ponte Gomilafa iha pontensiálidade kotu bainhira akontese udan boot.
Entretantu, iha loron-16 Marsu, akontese rai halai kauza husi udan-boot ne’ebé fó impaktu ba ponte Gomilafa hetan estragu husi parte karuk. Ponte referidu konstrui iha tempu okupasaun Indonézia ne’ebé fasilita movimentu transporte liuliu komunidade hamutuk 11.725 husi Baguia.
Ponte ne’e lokaliza iha baliza entre Suku Atelari, Postu Administrativu Laga ho Suku Lavateri, Postu Administrativu Baguia.
Jornalista: Natalino Belo
Editór: Xisto Freitas da Piedade
