DILI, 25 Marsu 2026 (TATOLI) – Pelican Paradise fó klarifikasaun kona-ba desizaun Governu ba kanselamentu projetu otél fitun lima ne’ebé atu konstrui iha suku Tíbar no reafirma nian kompromisu ba kumprimentu Akordu Investimentu Espesiál (AIE), nu’udar baze prinsipál ba dezenvolvimentu investimentu iha Timor-Leste.
Tuir komunikadu husi Pelican Paradise, empreza ne’e hateten katak tuir SIA ne’ebé asina iha loron 03 Janeiru 2022, Estadu iha obrigasaun atu fornese eletrisidade no bee ne’ebé adekuadu, no hamoos área projetu husi rezidente sira. Rekizitu rua ne’e esensiál atu implementa projetu ne’e la’o ba oin.
Pelican Paradise afirma katak, dezde asina akordu, sira levanta pedidu no nesesidade hirak ne’e ba autoridade relevante sira, liuliu iha faze dahuluk projetu nian. Maibé, tuir sira, karta ne’ebé haruka seidauk hetan resposta.
Empreza ne’e mós informa katak enkontru lubuk ida hala’o ona ho Vise-Primeiru-Ministru, TradeInvest, Bee Timor-Leste, Eletrisidade de Timor-Leste, no autoridade relevante seluk. Maski nune’e, to’o agora seidauk iha solusaun, enkuantu nesesidade bázika projetu nian sei la kumpre.
To’o ohin loron, tuir relatóriu, área projetu ne’e la asesu ba bee no eletrisidade ne’ebé adekuadu. Pelican Paradise subliña katak fornesimentu hirak ne’e nu’udar responsabilidade Estadu nian, maibé apoiu ne’e laiha, projetu ho eskala boot ne’e konsidera imposivel.
Maski enfrenta limitasaun sira, empreza reafirma nia kompromisu atu kontinua harii Galeria Unidade Espetákulu (Show Unit Gallery), uza de’it tanke bee no jeradór sira hanesan solusaun temporária, ne’ebé finansia husi empreza rasik.
Pelican Paradise mós argumenta katak atrazu sira iha implementasaun projetu la’ós kauza husi investidór, maibé tanba Governu la kumpre nia obrigasaun sira, inklui fornesimentu sertifikadu rai nian no finalizasaun husi akordu AIE nian, ne’ebé hatete katak sei lori maizumenus tinan 14.
“Situasaun atuál reflete falla husi Governu hodi kumpre nia obrigasaun kontratuál sira. Kualkér tentativa hodi kansela projetu iha sirkunstánsia sira ne’e hamosu preokupasaun séria sira kona-ba kumprimentu ba akordu”, haktuir husi komunikadu.
Jestór Projetu Pelican Paradise, Osvaldo Boavida, liuhusi konta ofisiál TikTok empreza katak investimentu iha área Tasi Tolu no Tíbar sei nafatin tuir kompromisu. Nia subliña katak obrigasaun atu fornese bee no eletrisidade ne’e estipula klaru iha AIE.
Nia sita kláuzula ida iha akordu ne’ebé afirma katak Estadu iha obrigasaun atu asegura disponibilidade husi fonte eletrisidade no bee ne’ebé sufisiente, no atu muda rezidente sira iha área projetu nian molok hahú serbisu.
Pelican Paradise repete ninia kompromisu atu kontinua projetu ne’e no husu ba Governu Timor-Leste, liuhusi Governu Konstitusionál da-IX, atu kumpre ninia obrigasaun sira ne’ebé konkorda ona, nune’e projetu ne’e bele realiza iha tinan 2026.
Entretantu, Samuel Ong, Diretór Pelican Paradise Holdings Timor-Leste, informa ba Tatoli katak resposta ofisiál empreza ne’e publika ona iha mídia sosiál no oras ne’e daudaun sira seidauk fó entrevista adisionál.
Iha sorin seluk, Governu Timor-Leste deside kansela projetu Pelican Paradise iha Tíbar, Likisá, hafoin projetu ne’e konsidera la hatudu progresu ne’ebé signifikativu durante maizumenus tinan 15 nia laran.
Desizaun ne’e fó sai husi Vise-Primeiru-Ministru, Francisco Kalbuadi Lay, no hetan ona aprovasaun husi Primeiru-Ministru, Xanana Gusmão.
Governu argumenta katak projetu ne’e la’o neneik, maski iha fornesimentu apoiu báziku hanesan bee no eletrisidade, enkuantu to’o ohin loron seidauk adekuadu. Pelican Paradise mós tuir relatóriu husu ona finansiamentu hamutuk millaun $180 ho funan anuál pursentu 4 ba dezenvolvimentu infraestrutura.
Projetu ne’e, ne’ebé hetan akordu liuhusi AIE iha 2022, inklui komponente prinsipál tolu: fornesimentu rai, bee, no eletrisidade husi Governu. Konstrusaun hahú iha fulan-Novembru 2022.
Notísia relevante: Governu kansela investimentu Pelican Paradise
Jornalista: Arminda Fonseca
Editora: Maria Auxiliadora
