DILI, 23 Marsu 2026 (TATOLI)-Governu liuhusi Ministériu Koordenadór ba Asuntu Ekonómiku (MKAE) deside kansela investimentu husi Pelican Paradise, liuliu ba konstrusaun otél fitun lima, iha suku Tíbar, postu administrativu Bazartete, munisípiu Likisá.
Deklarasaun ne’e hato’o husi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, bainhira halo diskusaun ho setor privadu sira iha ámbitu lansamentu Relatóriu Dezempeñu Ekonómiku Timor-Leste 2025, iha Sentru Konvensaun Dili, ohin.
Nia dehan kona-ba konstrusaun Pelican Paradise, Governu mós konxiente ida-ne’e no nia parte hamutuk ho Ministru Justisa, Sérgio Hornai, halo koordenasaun serbisu hodi deside no haree mós ho parte legál sira kona-ba asuntu lubuk ida.
“Hato’o ona ba señor ida ne’ebé atu halo investimentu tinan 15 nunka halo ne’e ami sei kansela. Ne’e desizaun no ha’u husu tiha orientasaun husi Primeiru-Ministru konkorda ona ho ida-ne’e”, Kalbuadi Lay informa.
Bainhira Ministru Koordenadór hato’o kanselamentu ba projetu Pelican Paradise, Primeiru-Ministru, Xanana Gusmão, ne’ebé hola parte iha atividade ne’e hatán ho liafuan badak de’it. “Loos”, nia hateten.
Antes ne’e, iha loron 04 Juñu 2025, Ministru Planeamentu Estratéjiku Investimentu, Gastão Sousa, hateten katak projetu ne’e la’o neineik tebes, tanba ne’e Govern diskute hela pasu sira tuirmai, inklui konsidera kontratu sira ne’ebé asina ona no koordena ho ministériu relevante sira.
“Ami prepara ona eletrisidade no bee ba projetu, maibé projetu ne’e la’o neineik. Ami forma ona grupu interministeriál ida inklui Justisa, Finansa, Obra Públika, Planeamentu Estratéjiku no Investimentu, no Sekretáriu Estadu ba Rai no Propriedade, hodi deside kona-ba kontinuasaun projetu nian”, ministru dehan.
Dezde Janeiru 2025, Pelican Paradise buka hela apoiu Governu nian iha forma depózitu millaun $180 ho funan anuál 4% hodi garante fornesimentu bee, eletrisidade, no lisensa konstrusaun nian, tuir Akordu Investimentu Espesiál (SIA) ne’ebé asina iha 2022.
Diretór Pelican Paradise, Samuel Ong, dehan katak sira-nia parte ladauk halo serbisu tanba laiha asesu ba bee no eletrisidade. “Ami-nia projetu sira labele la’o, inklui konstrusaun ba Show Unit Gallery iha Tibar Hill”, dehan.
Nia subliña katak la buka finansiamentu adisionál hosi Governu tanba nia iha ona parseiru finansiamentu millaun $825 ne’ebé prontu atu aproveita. Obstákulu prinsipál sira maka nafatin infraestrutura no apoiu administrativu hosi autoridade relevante sira.
Pelican Paradise asina SIA iha Janeiru 2022, ne’ebé trasa responsabilidade sira Governu nian ba rai, sistema bee-moos, no instalasaun elétriku sira. Maski BTL remata ona perfurasaun bee no EDTL monta ona transformador, kapasidade eletrisidade nafatin la sufisiente ba nesesidade projetu nian.
Lembra katak Pelican Paradise Group simu ona sertifikadu Deklarasaun Benefísiu tolu ho fundu investimentu inisiál ne’ebé kompostu husi Pelican Ahava, Unip., Lda., millaun $90, Pelican Elior Unip. Lda., millaun $110 no Rezerva Pelican Adara millaun $1.
Projetu ne’e tuir planu fó empregu ba ema na’in-1.500 durante konstrusaun no traballadór permanente na’in-1.300 hafoin konstrusaun no reflorestasaun ba área ne’e. Valór investimentu totál husi projetu ne’e kalkula besik millaun $700.
Notísia relevante: Pelican Paradise sei finaliza konstrusaun show unit gallery tinan ne’e
Iha estimativa katak 80% husi área totál sei hetan reflorestasaun no restaurasaun ambientál.
Projetu ne’e sei dezenvolve kompleta ho turizmu integradu, iha área ho totál maizumenus ektare 558, ne’ebé lokaliza entre Tasi-Tolu no Tíbar, ne’ebé sei inklui otél ida, kampu golfe, rezidénsia sira, sentru dezenvolvimentu juventude, eskola internasionál, ospitál internasionál no sentru komersiál tolu.
Prezidente Repúblika, José Ramos-Horta, Primeiru-Ministru, Taur Matan Ruak, no Prezidente Pelican Paradise Datuk Dr, Edward Ong, asina ona plaka no halo lansamentu fatuk dahuluk, iha 25 Novembru 2022, ba futuru konstrusaun otél fitun lima ne’e.
Desizaun kanselamentu ne’e marka finál ba planu boot investimentu iha Tíbar, hafoin liu dékada ida planeamentu no preparasaun ne’ebé atraza.
Notísia relevante: Governu sei foti desizaun ba projetu Pelican Paradise
Jornalista: Arminda Fonseca
Editora: Maria Auxiliadora
