BOBONARU, 26 Marsu 2026 (TATOLI) – Membru Konsellu Koordenasaun Munisipál Bobonaru, realiza enkontru datoluk hodi diskute frajilidade no rekomendasaun husi Governu sentrál kona-ba avaliasaun kondisaun mínima ba implementasaun podér lokál no desentralizasaun administrativa.
Prezidente Autoridade Munisípiu Bobonaru, Paulo Moniz Maia, hateten liuhusi esforsu ekipa traballu durante fulan tolu Bobonaru hetan avaliasaun ho klasifikasaun “muito bom” husi Governu sentrál, maibé rezultadu ne’e seidauk to’o iha ninia finalidade tanba sei iha frajilidade no rekomendasaun husu Ministeriu Administrasaun Estatál ne’ebé presiza kompleta.
Notísia relevante: Xanana: Bobonaru-oan tenke ho lema “SAMBOKER” hodi simu podér lokál
“Rezultadu avaliasaun kondisaun mínima, frajilidade, no rekomendasaun sira ita hatene pontuasaun para ita-nia klafikasaun muito bom ne’e iha pontu hamutuk 80,56%, ne’e valór ida boot”, nia hateten iha Salaun Maria Tapó, ohin.
Rekomendasaun sira ne’e iha pontu importante mak iha Sistema Administrativu no Expediente presiza mellora prosedimentu administrativu (korrespondénsia, despaixu) no hadi’ak servisu jestaun arkivu no aplikasaun sistema arkivu dijitál.
Aleinde ne’e, iha área rekursu umanu presiza aumenta volume asisténsia téknika no formasaun téknika iha área planeamentu, administrasaun, finansa, aprovizionamentu no informátika liuhusi MAE. Dezenvolve planu formasaun integradu ba rekursu umanu anuál hodi aliña ho orientasaun no madatalan husi MAE, kria Standard Operational Procedure no Termu Referénsia hodi fasilita kolokasaun kuadru tuir nesesidade servisu iha munisipiu.
Presiza mós atualiza baze dadus rekursu umanu munisipál trimestralmente, identifika kabementu orsamentu molok halo rekrutamentu ba forsa traballu foun, reforsa kapasidade munisípiu hodi identifika no rekolla reseita lokál hodi hamenus dependénsia ba orsamentu husi Governu sentral, Kontratu Termu Sertu ba pesoál apoiu área jurídiku hodi fasilita interpretasaun legál no prosedimentu iha Autoridade Munisipál.
Nune’e mós hasa’e jestaun finansa, aprovizionamentu no patrimóniu, presiza kria sistema akuntablidade ida internu hodi jere ezekusaun kategoria sira husi orsamentu mai munisípiu no seluk tan.
Sekretariu Autoridade Munisípiu Bobonaru, Semedo Laco Costa, reforsa katak rekomendasaun hirak ne’e pertinente no rekoñese sei iha problema. “Rekomendasaun hirak ne’e mak ita presiza hadi’a hamutuk, tanba la sala ekipa ida sei mai fali iha fulan-Juñu ou Jullu. Ohin ita koalia ona ida ne’ebé ita hadi’ak ona no ida ne’ebé seidauk para ita bele pasa no hakat ba podér lokál”, nia dehan.
Notisía relevante: MAE avalia lakuna iha implementasaun kompeténsia públika iha Bobonaru
Jornalista: Sergio da Cruz
Editora: Maria Auxiliadora
