DILI, 26 Marsu 2026 (TATOLI)–Primeiru-Ministru, Kay Rala Xanana Gusmão, kinta ne’e, hasoru malu no wrlata servisu ne’ebé Governu kona-ba rekrutamentu PNTL no garante kombustível iha Timor-Leste ba Prezidente Repúblika José Ramos-Horta.
Notísia Relevante: Governu aprova medida temporária ba estabilizasaun folin kombustível-garante abastesimentu
“Ha’u enkontru ho Prezidente Repúblika informa kona-ba prosesu rekrutamentu Polísia Nasionál Timor-Leste (PNTL) halo foun fali, ha’u mós informa kona-ba Konsellu Ministru aprova medida temporária ba estabilizasaun folin kombustível-garante abastesimentu no harii ona komisaun ida kona-ba presu konbustível nian,” Xefe Governu ne’e hateten ba jornalista sira hafoin ramata enkontru ho Xefe Estadu iha Palásiu Prezidnesiál Nicolau Lobato, Bairru Pite, ohin.
Konsellu Ministrus, Kuarta (25 Mmarsu 2026), aprova projetu Dekretu-Lei ne’ebé estabelese medida temporária hodi estabiliza folin kombustíveis no garante seguransa ba sira-nia fornesimentu iha Timor-Leste, ne’ebé aprezenta husi Ministru Petróleu no Rekursu Minerál, Francisco da Costa Monteiro.
Diploma ne’e ho objetivu atu hamenus impaktu husi instabilidade internasionál atuál iha setór enerjétiku, proteje kbiit sosa husi família sira, hamenus impaktu aumentu folin ne’ebé karik akontese iha ekonomia no garante funsionamentu regulár husi atividade ekonómika, iha tempu hanesan hodi garante disponibilidade husi kombustivel sira iha territóriu.
Diploma ne’e define limite másimu ba folin ne’ebé fa’an ba konsumidór, hodi fiksa valór $1,50 kada litru ba gazolina, $1,65 kada litru ba gazóleu, kombustivel aviasaun nian (avtur) $2,50 kada litru no gás petrolíferu líkidu (GLP) iha $4,2 kada kilograma.
Atu garante limite sira-ne’e, importadór sira ba oin tenke aprezenta kustu importasaun loloos, ne’ebé sai hanesan baze hodi kalkula subsídiu ne’ebé Estadu sei fó, ne’ebé finansia liuhusi Orsamentu Jerál Estadu.
Dekretu-Lei ne’e prevee mós medida sira hodi garante kontinuidade abastesimentu, inklui definisaun estratéjia importasaun nian ba kombustivel esensiál sira, iha koordenasaun entre entidade públika no operadór sira setór ne’e nian, no mós posibilidade atu adota mekanizmu exepsionál sira ba regulasaun merkadu.
Kona-ba fiskalizasaun, reforsa asaun hosi autoridade kompetente sira, ho atensaun espesiál hodi prevene dezviu kombustivel sira ne’ebé hetan subsídiu atu sai hosi territóriu nasionál no aplika sansaun sira karik laiha kumprimentu.
Medida sira ho karáter temporáriu no vigora nafatin to’o tinan ne’e nia rohan, no bele hetan revizaun, prorrogasaun (hanaruk) ka termina depende ba evolusaun merkadu internasionál nian.
Notísia Relevante: Governu anula konkursu públiku admisaun ba ajente PNTL 2025-sei loke fali kokursu iha 2026
Jornalista : Hortencio Sanchez
Editór : Cancio Ximenes
