DILI, 25 Marsu 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu Dekretu-Lei ne’ebé estabelese medida temporária hodi estabiliza folin kombustível no garante seguransa ba sira-nia fornesimentu iha Timor-Leste, ne’ebé aprezenta hosi Ministru Petróleu no Rekursu Minerál, Francisco da Costa Monteiro.
Diploma ne’e ho objetivu atu hamenus impaktu husi instabilidade internasionál atuál iha setór enerjétiku, proteje kbiit sosa husi família sira, hamenus impaktu aumentu folin ne’ebé karik akontese iha ekonomia no garante funsionamentu regulár husi atividade ekonómika, iha tempu hanesan hodi garante disponibilidade husi kombustível sira iha territóriu nasionál.
Diploma ne’e define limite másimu ba folin ne’ebé fa’an ba konsumidór, hodi fiksa valór $1,50 kada litru ba gazolina, $1,65 kada litru ba gazóleu, kombustível aviasaun nian (avtur) $50 kada litru, no gás petrolíferu líkidu (GLP) iha $4,2 kada kilograma.
Atu garante limite sira-ne’e, importadór sira ba oin tenke aprezenta kustu importasaun loloos, ne’ebé sai hanesan baze hodi kalkula subsídiu ne’ebé Estadu sei fó, ne’ebé finansia liuhusi Orsamentu Jerál Estadu.
Dekretu-Lei ne’e prevee mós medida sira hodi garante kontinuidade abastesimentu, inklui definisaun estratéjia importasaun nian ba kombustivel esensiál sira, iha koordenasaun entre entidade públika no operadór sira setór ne’e nian, nomós posibilidade atu adota mekanizmu exepsionál sira ba regulasaun merkadu.
Kona-ba fiskalizasaun, reforsa asaun husi autoridade kompetente sira, ho atensaun espesiál hodi prevene dezviu kombustivel sira ne’ebé hetan subsídiu atu sai husi territóriu nasionál no aplika sansaun sira karik laiha kumprimentu.
Medida sira ho karáter temporáriu no vigora nafatin to’o tinan ne’e nia rohan, no bele hetan revizaun, prorrogasaun (hanaruk) ka termina depende ba evolusaun merkadu internasionál nian.
TATOLI
