OEKUSI, 26 Marsu 2026 (TATOLI) – Sekretáriu Estadu Protesaun Sívil (SEPS), Domingos Mariano Reis, kinta ne’e, oferese apoia emerjénsia ba vítima dezastre naturál hamutuk uma-kain 50 iha suku Cunha sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Governante ne’e informa, katak, apoia ne’e responsabilidade Governu nian, tanba Governu nia prezensa atu proteze no fó asisténsia ba sidadaun sira, ne’ebé mak hakilar hamlaha tanba dezastre naturál.
Tanba ne’e, Governante ne’e, reprezenta Governu Sentrál, hato’o solidariedade ba vítima dezastre naturál ba povu Oekusi, liliu suku haat ne’ebé enfrenta dezastre naturál.
“Ami-nia prezensa sempre fó esperansa ba sidadaun hot
u, ami-nia responsabilidade morál polítika husi Nonu Governu Konstitusionál nian, nafatin apoia ba ita-boot sira, maske kbiit ne’e ki’ik maibé ida-ne’e mak realidade, ami tenki demostra no halo duni ida-ne’e ba ita bo’ot sira,” Autoridade ne’e hato’o.
Iha biban ne’e, Sekretáriu Estadu Protesaun Sívil ne’e, rekomenda ba autoridade lokál sira, atu serbisu hamutuk ho Autoridade Protesaun Sívil Oekusi, hodi kontinua rekolla dadus vítima dezastre naturál, atu submete ba nasionál ba futuru bele konsidera hodi hetan rekuperasaun.
“Karik sira-ne’ebé afeta aat totál, husu liurai suku no aldeia sira sira, atu alista hodi submete ba APC Oekusi, atu hato’o nasionál, hodi hetan materiál rekuperasaun, maibé sira-ne’ebé afeta aat kamán, Governu iha responsabilidade atu fó apoia food item no non food item,” nia apela.
Notísia relevante:SEPS apoia foos saka 1.500 ba RAEOA hodi atende dezastre naturál
Domingos Ribeiru, nu’udar vítima dezastre naturál husi suku Cunha, orgullu ba intervensaun apoia husi Governu, maibé rekomenda ba futuru bele konstroi gabiaun ba mota ne’ebé kada tinan fó ameasa ba komunidade sira iha suku Cunha.
“Ha’u-nia uma hetan estragu tanba bee sa’e tama to’o uma laran, estraga kulkas, kulsaun no sasán dapur nian, inklui televizaun, maibé agradese tanba ohin Governu ajuda netik ami, hanesan foos no sasán seluk, tan ne’ebé ami la ejize maibé Governu presiza tau matan. Sei bele iha futuru hadi’a Netik mota ne’ebé besik ami, presiza tau gabiaun, tanba tinan-tinan ami sofre hela de’it ba inundasaun,” nia hateten.
Notísia relevante:SEPS oferese materiál konstrusaun ho osan ba vítima dezastre 17 iha Oekusi
Rekorde fali katak, iha loron fulan Marsu ne’e, akontese udan boot, hamosu inundasaun iha Oekusi durante loron tolu, hahú 24 to’o 26 Marsu 2026 ne’e, hodi rezulta vítima 151, husi suku haat, Bobokase, Naimeko no suku Cunha, Lalisuk afeta inundasaun hodi estraga uma hela fatin, toos inklui animál balun.
Jornalista: Abílio Elo Nini
Editór: Rafael Ximenes de A. Belo
