OEKUSI, 23 Outubru 2025 (TATOLI) – Sekretáriu Estadu Protesaun Sívil (SEPS), kinta ne’e, oferese materiál konstrusaun sívil ho pakotementu inklui orsamentu mão de obra rihun $13,500 ba vítima dezastre naturál hamutuk uma-kain 17 iha Rejiaun Administrativa Espesiál Oekusi Ambeno (RAEOA).
Notísia relevante:SEPS apoia foos 500 ba suku 20 iha Oekusi
Sekretáriu Estadu Protesaun Sívil, Domingos Mariano Reis, informa vítima 17 ne’e, afeta dezastre lahanesan, uma-kain hitu hetan dezastre ho tipu estragu totál, iha direitu simu pakote materiál konstrusaun sívil ho osan mão de obra kada uma-kain hetan rihun $1000,00.
Uma-kain ida hetan dezastre ho tipu natoon, simu materiál konstrusaun ho osan maun de obra $750,00, no uma-kain sia mak hetan dezastre ho tipu kamaan, kada uma-kain simu pakote materiál konstrusaun ho osan mão de obra $600,00.
“Osan ne’e fahe ba item rua, $150 uza selu transporte atu tula materiál sira ba família idak-idak nia hela fatin, restante uza atu selu badaen hodi konstrui falu uma dignu ida atu hela ho seguru,” nia hateten iha suku Naimeko, ohin.
Iha ámbitu ne’e, Governante ne’e, rekomenda ba vítima dezastre naturál sira katak, Governu iha responsabilidade morál atu tulun família ne’ebé hetan dezastre, tan ne’e Autoridade Protesaun Sívil (APC) sei forma ekipa konjunta ida, atu kontrola kada fulan tolu ba vítima sira, atu halo duni uma dignu, no proibidu atu fa’an no fó tutan ba ema seluk.
“Ha’u husu ba família sira 17, ohin simu ona apoia, harii hikas sira-nia uma atu hela hanesan mós ho sidadaun seluk, hela iha fatin dignu, no labele harii uma iha rai ne’ebé disputa, iha mota-ninin, labele harii uma besik ai-hun bo’ot sira no rai ne’ebé halai, bainhira la ita kumpre ida-ne’e, siginfika ita ariska aan iha fatin risku, no labele fa’an no fó tutan,” nia fó hanoin.
Notísia relevante:Vítima inséndiu Usitasa’e simu materiál konstrusaun husi SEPS
Xefe Suku Naimeko Marcos Liu, agradese ba Governu, tanba dadus ne’ebé rekolla iha baze, autoridade lokál sira submete kedas pedidu ba Autoridade Protesaun Sívil Oekusi konsege responde ona vítima sira-nia preokupasaun.
Tanba ne’e, nia promete sei hamutuk ho Konsellu-Suku sira, atu akompaña vítima sira, kona-ba utilizasaun materiál sira-ne’ebé hetan ona apoia husi Sekretáriu Estadu Protesaun Sívil.
“Ohin mós parte SEPS rekomenda ona ami xefe suku no aldeia to’o delegadu sira, atu akompaña sira (vítima) atu kontrola sira, tanba materiál kuandu to’o ona liman, tenke harii fali uma dignu no seguru atu hela, labele fa’an ka fó tutan ba ema seluk, ida-ne’e ami kumpre sei halo tuir,” nia promete.
Maria Ais nu’udar vítima husi aldeia Manuimpena Suku Lalisuk, orgullu tanba iha 2024 hetan dezastre ahi-han mutuk nia uma, maibé Governu la haluha hodi fó netik tulun atu hakma’an nia sofrimentu.
“Ha’u kontente tanba iha tinan kotuk 2024 fulan-Maiu, ha’u-nia uma ahi han mutuk maibé agora Governu hanoin ami no fó ona materiál mai ha’u,” nia orgullu.
Notísia relevante:SEPS kontinua apoia nesesidade bázika ba vítima inséndiu iha Usitasa’e
Entretantu, vítima ne’ebé simu apoia ne’e mai husi suku ualu (8) mak hanesan, suku Malelat, Lela-Ufe, Taiboko, Costa, Naimeko, Lalisuk no suku Nípani.
Pakote materiál konstrusaun sívil hirak-ne’e, komposta husi kalen,besi-baza, simenti, pregu, arame, besi-beton no materiál seluktan,
Tuir dadus, iha 2025 SEPS rejista vítima dezastre naturál hamutuk 2.191maibé 517 simu ona apoia rekuperasaun ho materiál konstrusaun no osan mão de obra no tuir planu iha Novembru 2025 ne’e, sei kontinua apoia vítima dezastre naturál 1674.
Jornalista: Abílio Elo Nini
Editór: Rafael Ximenes de A. Belo
