OÉ-CUSSE, 20 Novembru 2024 (TATOLI) – Sekretáriu Estadu Protesaun Sivíl (SEPS), Domingos Mariano dos Reis, vizita vítima inséndiu iha aldeia Buqui, suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA) no oferese mós nesesidade bázika hanesan foos kilógrama 50 ba kada família.
Governante ne’e hateten, bainhira inséndiu akontese, SEPS simu direta informasaun husi deputada sira ne’ebé levanta iha plenária, nune’e orienta kedas Autoridade Protesaun Sivíl Oé-Cusse hodi responde imediata, maibé tanba distánsia dook kuaze kilometru 50 husi Oé-Cusse Vila bá fatin akontesimentu, entaun bombeiru la konsege halo intervensaun lalais.
“Agora, medida saida mak tenke responde ba iha etapa tolu, primeiru, tenke hasai vítima sira husi fatin ne’ebé risku bá fatin séguru, segundu mak apoia emerjénsia, terseiru nian mak halo levantamentu ba apoia rekuperasaun. Ohin, ha’u mai kompleta de’it, tanba semana kotuk APC hamutuk ho parsériu sira apoia ona ai-han balun, nomos ekipamentu dapur nian. Ne’ebé ha’u mai apoia tan uitoan atu hakmaan imi-nia nesesidade”, Domingos dos Reis dehan ba vítima sira, ohin.
Nia informa, antes ne’e, parte SEPS mós simu ona relatóriu husi Zona Espesiál Ekonómika no Dezenvolvimentu Oé-Cusse Ambeno (ZEEDOA), ne’ebé anexa kedas ho dokumentu komprovativu sira hanesan fixa família, kartaun eleitorál, tanba ne’e persiza observa direta vítima sira iha terrenu atu prepara ba apoiu kontínua iha futuru.
“Ha’u lori Governu nia naran, liuhusi SEPS hato’o solidariedade laiha rohan ba ita-boot sira, maske hetan ona ajuda iha loron hirak bá kotuk, maibé ohin ha’u hakarak ajuda tan ita-boot sira”, nia dehan.
Notísia relevante: Inséndiu iha Usitasa’e, Palmira Mala lakon osan $6.400
Xefe aldeia Buqui, Simão Quelo, agradese tanba Governu bele tulun tan vítima sira, tanba iha inséndiu ne’e vítima sira la konsege salva sira-nia ai-han, roupa no osan.
“Husi parte Governu vizita beibeik komunidade, sira sente kontente tanba susar ne’ebé sira hetan todan tebes, entaun presiza apoia netik sira liuhusi materiál no sujestaun balun”, nia hateten.
Inséndiu ne’e akontese iha loron 13, pur volta tuku 17:30, no rezulta ahi han mutuk uma 12 no halo membru família 48 lakon sira-nia hela fatin no inan-ferik ida konsege hetan kanek no daudaun ne’e hala’o hela tratamentu iha Ospitál Referénsia Oé-Cusse.
Antes ne’e, autoridade RAEOA liuhusi Asesór ba Asuntu Sosiál no Autoridade Protesaun Sivíl (APC) ho parseiru sira hanesan Krús Vermella Timor-Leste (CVTL) filial Oé-Cusse no Programa Mundiál Alimentasaun (WFP) apoia ona nesesidade balun hanesan, foos, supermie, ikan-lata, susubeen, biskuit, mina, kafé, masin-midar no sasán dapur nian mak hanesan bikan, kanuru, balde, lona, roupa, sabaun no seluk tan.
Notísia relevante: APC no parseiru apoia ona nesesidade bázika ba vítima inséndiu iha Usitasa’e
Jornalista: Abílio Elo Nini
Editora: Maria Auxiliadora
