OÉ-CUSSE, 05 Dezembru 2024 (TATOLI) – Vítima inséndiu iha aldeia Buqui, suku Usitasa’e, sub-rejiaun Oésilo, simu ona materiál konstrusaun husi Sekretaria Estadu Protesaun Sivíl (SEPS) hodi rekonstrui rezidénsia ne’ebé ahi han mutuk.
Sekretáriu Estadu Protesaun Sivíl, Domingos Mariano dos Reis, informa katak distribuisaun materiál ba rekuperasaun sira-ne’e ho baze ba dekretu-lei númeru 07/2021, atribui kompeténsia ba SEPS atu fó asisténsia emerjénsia no rekuperasaun ba vítima dezastre naturál sira.
“Tanba ne’e, ohin, ita rekupera vítima uma-kain 11 ho materiál konstrusaun de’it, tanba família ida hela hamutuk. Kona-ba osan fó $1000 no $150 atu selu transporte hodi tula materiál sira bá foho, ba mão de obra $850, ita sei fó iha janeiru 2025, tanba ita prevee ona iha OJE tinan oin nian”, governante ne’e adianta.
Notísia relevante: SEPS kontinua apoia nesesidade bázika ba vítima inséndiu iha Usitasa’e
Nia rekomenda mós ba vítima sira atu kumpre bainhira harii uma, liuliu medida prevensaun, edukasaun ba redusaun risku dezastre naturál atu labele harii uma iha fatin ne’ebé risku no labele fa’an tutan sasán ka fó deve ba ema seluk, labele harii uma iha rai ne’ebé disputa ka rai Estadu, labele harii uma besik mota-ninin, labele harii uma iha rai ne’ebé halai no labele harii uma besik ai-hun boot sira.
“Tanba fatin sira-ne’e bele sai kauza ba dezastre tuirmai no afeta ba vida no bele lakon tan sasán ne’ebé Governu apoia ona. Tanba ne’e, tenke prevene atu kada tinan labele rekupera beibeik”, nia fó hanoin.
Jestór sub-rejiaun Oésilo, Benedito Ulan, relembra katak inséndiu akontese iha 13 Novembru no Governu fó apoia imediata tanba agora tempu udan, nune’e família vítima sira bele hela iha uma dignu hanesan ho ema seluk.
“Ita haree inan-aman sira terus no triste ho dezastre ne’e no buat barak mak estraga. Ne’e duni ha’u lori autoridade lokál agradese ba Governu tanba Oé-Cusse dook, maibé konsege mai to’o duni atu oferese apoia ne’e ba vítima sira. Ida-ne’e ita-nia komunidade sente kmaan ona, tanba Governu la haluha nia povu bainhira enfrenta problema iha baze”, nia hato’o.
Notísia relevante:Autoridade sei fornese dokumentu ba vítima inséndiu Usitasa’e
Lazaro Punef nu’udar vítima inséndiu dehan sira simu ona materiál konstrusaun sira hanesan zinku, simentu, besi-betong, pregu, metru, balde, inklui sasán seluk ne’ebé kompleta ba uma ida nian.
“Materiál sira-ne’e kompletu ba uma ida nian, tanba simentu saku 50 ho besi-betong no pregu. Ne’ebé, ohin, dehan fó ho osan, maibé ami sei hein to’o Janeiru 2025 mak foti. Ha’u kontente no agradese ba Governu tanba apoia ona materiál barak”, nia dehan.
Inséndiu ne’e akontese iha loron 13 Novembru 2024 pur volta tuku 17:30 hodi rezulta ahi han mutuk uma 12 (inklui uma adat ida) no família balun lakon osan no animál.
Notísia relevante: Inséndiu iha Usitasa’e, Palmira Mala lakon osan $6.400
Jornalista: Abílio Elo Nini
Editora: Maria Auxiliadora
