APTL-UNFPA realiza workshop kona-ba komunikasaun sosiál no mudansa hahalok
DILI, 27 Marsu 2026 (TATOLI)—Asosiasaun Parteira Timor-Leste (APTL) hamutuk ho UNFPA hala’o workshop kona-ba komunikasaun sosiál no mudansa hahalok ka social and behavior change communication ba parteira sira-ne’ebé mak servisu iha Munisípiu Dili, ho objetivu atu hasa’e kapasdade parteira nian iha komunikasaun efetivu atu promove mudansa komportamentu saúde di’ak ba inan no oan.
“Workshop ne’e atu haree liu kona-ba parteira sira-nia komportamentu no komunikasaun tanba sira mak liña dahuluk atu bele fó kuidadu ba inan no oan iha ita-nia komunidade,“ Prezidente Asosiasaun Parteira Timor-Leste, Lidia Gomes, hateten ba jornalista sira iha Hotel Timor, ohin.
Nia dehan, banhira inan sira mai buka fasilidade saúde ko’alia ho empatia hadomi inan sira hanesan sira-nia an rasik sira, tenke rona ho tilun haree ho matan antes atu fó asisténsia ba inan ho oan sira.
“Husi formasaun sira-ne’e oinsá atu hadi’a sira-nia komportamentu no ablidade nune’e bele hasoru komunidade banhira atu mai partu,” nia dehan.
Nia esplika, parteira sira-ne’ebé mak daudaun ne’e iha Timor-Leste besik ona 2.000, maibé haree fila-fali ba estartéjia Ministériu Saúde nian to’o 2030 tenke tau parteira rua (2), enfermeiru rua (2) no mediku na’in-ida (1) no aliadu sira seluk, maibé realidade seidauk kompleta hotu kedas.
Iha fatin hanesan, Adjunta Reprezentante UNFPA iha Timor-leste, Domingas Bernardo, hateten workshop ohin ne’e atu hadi’a hametin tulun servisu parteira sira-nian tanba ne’e hasa’e abailidade parteira sra-nian hodi bele hala’o servisu sira-ne’e, entaun oinsá bele fahe informasaun kona-ba komunikasaun atu muda hahalok ema-nian nomós parteira sira-nian.
“Peskiza 2024-2025 rezultadu hatudu katak tenke investe oinsá atu hasa’e abilidade parteira sira-nian, tanba sira mak liña dahuluk ba iha servisu kuidadu saúde materna infantil maibé iha peskiza ne’e hatudu katak parteira nia kna’ar importante iha saúde,” nia dehan.
Prezidente Asosiasaun Parteira Munisípiu Dili, Joaquina Francisca Belo, hateten workshop ida-ne’e atu hasa’e parteira sira-nia abilidade oinsá atu atende di’ak liután ba inan sira-ne’ebé mak mai iha fasilidade saúde.
“Ami esforsu nafatin hodi fó kapasitasaun ba maluk parteira sira atu hatán ba problema sira-ne’ebé mak mosu iha fasilidade saúde liu liu komunidade sira dehan ami-nia komunikasaun atetude ladun di’ak. Maibé la’ós parteira hotu-hotu maibé ami rekonese ida ne’e banhira akontese. Liu husi ami-nia formasaun ne’ebé mak iha ne’e espera katak bele hanesan fó nafatin koñesimentu di’ak ba parteira sira atu bele fó aatendimentu no komunikasaun ne’ebé mak diak,” nia hateten.
Nia dehan parteira sira-ne’ebé mak daudaun ne’e hala’o servisu iha Munisípiu Dili hamutuk 200-resin iha Sentru saúde no postu saúde sira no iha Servisu Saúde Munisípiu Dili.
Jornalista : Felicidade Ximenes
Editór : Cancio Ximenes
