BAUKAU, 27 Marsu 2026 (TATOLI)—Irrigasaun Waidasu ne’ebé lokaliza iha Suku Uma-Ana Iku, Postu Administrativu Venilale hahú ameasadu estraga mezmu foin inaugura iha inísiu tinan-ne’e.
Xefe Suku Uma-Ana Iku, Antônio da Costa Freitas, esplika kanál irrigasaun referida inaugura direta husi Ministru Agrikultura, Pekuária, Peska no Floresta (MAPPF) hamutuk ho Autoridade Munisipál Baukau (AMB) iha loron 19 Janeiru maibé atuál hahú nakfera tanba konsideradu obra referida laiha kualidade.
“Ita haree ba kualidade projetu ne’e kategoria la’o ladi’ak, tanba la identifika sasán ne’ebé mak uza ba asegura nia kualidade ne’e. Rai-henek sira kahur ho tahu-teen to’o agora komesa nakfera aat liu tiha ona,” Antônio hateten iha Salaun Apuramentu Administrasaun Munisipál Vila Nova, Baukau, Sesta ne’e.
Antônio Freitas relata projetu referida konstrui husi kompañia lokál iha-ne’ebé finaliza iha finde Dezembru 2025 maibé kanál irrigasaun hahú nakfera inklui bee-matan tun liuhusi kanál fó impaktu bee ladún maka’as nune’e afeta ba komunidade nia natar no produtu agríkola seluk.
Nia salienta liuhusi identifikasaun kanál irrigasaun estragu iha lokál pontu hamutuk lima ne’ebé kategoria grave nune’e rekomenda kompaña responsavel halo manutensaun nune’e evita mosu estragu totál.
“Ha’u rona kompañia prevee osan pursentu sanulu (10) atu halo manutensaun, aat iha-ne’ebé ne’e hadi’a ida-ne’e. Ami autoridade hein de’it,” Antônio akresenta.
Entretantu, projetu konstrusaun irrigasaun Waidasu responsabiliza husi Kompañia Rozi Unipesóal, Lda ho totál orsamentu hamutuk rihun $180 ne’ebé benefísia ba natar hamutuk ekatare 40 husi aldeia rua kompostu Uai-tunau no Quele-Boro-Uai ho totál benefisiáriu hamutuk 1.389.
Jornalista: Natalino Belo
Editór: Xisto Freitas da Piedade
