Família husu apoiu ba Estadu atu harii monumentu ba Saudozu ‘Asucoli’
BOBONARU, 28 Marsu 2026 (TATOLI)–Família antigu komandante FALINTIL iha rejiaun Oeste Kavalaria 5 Bobonaru, Saudozu Manuel Soares “Asucoli”, iha planu atu harii monumentu ida hodi rekoñese saudozu ninia luta rezisténsia ba libertasaun nasionál, maibé sira husu Estadu nia apoiu atu bele monumentu ne’e.
Reprezentante família, Rincy Nepu, hateten Saudozu Manuel Soares durante tinan 1966 to’o 1975 servisu hamutuk ho líder rezisténsia sira inklui Francisco Guterres Lu-Olo, no iha períodu ne’ebá nia mos hanesan fundadór FRETILIN nian.
Nia hatutan, família hetan ona saudozu nia restu mortál iha Munisípiu Manatutu iha parte Natarbora no daudaun ne’e konserva temporária hela iha rezidénsia, nune’e família sei kontinua servisu hamutuk ho organizasaun sira hanesan CNC (Centro Nacional Chega) no Friendship Austrália hodi realiza projetu refere, maske to’o agora seidauk klaru kona-ba apoiu husi Estadu.
“Ami atu haloot ami-nia aman nia restu mortál, Estadu dehan imi-nia aman la’os mate tanba moras maibé tanba ukun no kaer kilat duni no lista duni iha estrutura. Ami familia iha planu rasik, husi familia nia kbiit, ami ativista ho CNC, Friendship Austrália, ami hakarak atu harii iduni monumentu ba ami-nia aman hanesan ema rezisténsia ida. Ami iha dalan tiha ona, maibé Estadu fó dalan ka lae, Estadu apoia ka lae, ami fiar katak aman nia luta mós ba libertasaun nasionál,” nia hateten iha CNC nia programa konsultasaun kona-ba Polítika Rekonsiliasaun no Lei Reparasaun Nasionál ne’ebé realiza iha Maliana, sesta (27 Marsu 2026) ne’e.
Iha parte seluk, Prezidente Autoridade Munisípiu Bobonaru, Paulo Moniz Maia, afirma katak Manuel Soares hanesan figura importante ida-ne’ebé kontribui boot ba rezisténsia maibé to’o agora seidauk iha monumentu ofisiál ida ba saudozu refere.
Nia dehan, asuntu ne’e sei tau iha prioridade bainhira Munisípiu Bobonaru hakat ona ba Podér Lokál no desentralizasaun administrativa.
“Loos, fatin ka monumentu ruma ita seidauk halo. Saudozu Manuel Soares ninia inkluindu Saudoza Maria-Tapo, sira naran boot maibé seidauk iha monumentu ida atu rekoñese katak Bobonaru mos halo buat ruma. Tanba ne’e mak ita sira-ne’e hamutuk prepara atu simu podér lokál, ne’e mak ita bele tau osan iha planu orsamentu atu buat kiik sira hanesan ne’e, ita bele rezolve rasik. Se lae, buat kiik-bo’ot, ita husu ba leten, seidauk fó ita hotu pasiensia iha ne’e mai,” nia hateten.
Família fiar katak, ho kolaborasaun entre parte hotu, projetu harii monument ida ba Manuel Soares bele realiza iha futuru atu halo memória rezisténsia kontinua moris iha jerasaun foun sira-nia fuan no laran.
Notísia Relevante: Xanana kompromete harii monumentu ba eroína Maria Tapó
Jornalista : Sergio da Cruz
Editór : Cancio Ximenes
