KOVALIMA, 28 Marsu 2026 (TATOLI)—Xefe Departamentu Dezenvolvimentu Jestaun Rede Munisipál Sentru no Postu saúde Kovalima, Teófilo Amaral, informa Servisu Saúde Munisípiu Kovalima rejista ona kazu moras dengue hamutuk na’in-160 iha ospitál referál Kovalima.
“Pasiente sira-ne’e baixa iha ospitál referál Suai, balun konsege alta ona no balun sei baixa hela maibé haree sira-nia kondisaun di’ak tanba halo tratamentu iha Ospitál,” Xefe Administrasaun Servisu Saúde munisípiu Kovalima,” Teófilo Amaral informa ba jornalista iha Suai, ohin.
Relasiona ho kazu hirak ne’e, iha Munisípiu Kovalima nafatin orienta ba sentru Saúde Komunitária sira halo intervensaun tuir fatin ne’ebé mak deteta kazu moras dengue iha Kovalima.
Ekipa saúde hala’o edukasaun promosaun saùde hodi halo intervensaun atu Halo distribuisaun abate halo limpeza Jerál.
Kazu moras dengue iha Kovalima maiora husi postu administrativu Suai, balun mai husi postu administrativu sira seluk, tanba impaktu husi ambiente fo’er hanesan la hamoos kalen aat sira hodi hamosu susuk tata sidadaun hodi lori moras dengue.
Tanba ne’e, Governu liuhusi servisu saùde Kovalima nafatin apela ba komunidade no líder komunitária sira atu partilla informasaun ba komunidade, nune’e bele prevene moras dengue.
Jornalista : Celestina Teles
Editór : Cancio Ximenes
