DILI, 30 Marsu 2026 (TATOLI)—Diretora Administrasaun Finansa Lojístika no Aprovizionamentu iha HNGV, Silvia Izina Ximenes, informa durante 2025 ne’e Hospital Nasionál Guido Valadares (HNGV) kontribui reseita ba kofre Estadu hamutuk $404.868,65.
“Fonte resesita ne’e mai husi ema estranjeiru no mós ema lokál,” Silvia Izina Ximenes hateten ba jornalista sira iha nia kna’ar fatin HNGV, Bidau, ohin.
Nia haktuir,h usi reseita ne’e mai husi estranjeiru hamutuk $152.492,69 no husi ema lokál hamutuk $ 252.375,96.
“Reseita sira-ne’e mai husi medical check up, VIP, teste médiku ba servisu nian. Se ba estranjeiru karik iha konsulta hanesan sira tama iha emerjénsia depois OPD, VIP inklui ai-moruk no sira seluk,” nia dehan.
Nia esplika, reseita ne’ebé mak iha ne’e la hanesan ema lokál mak baixa iha VIP selu kalan ida $35 no estranjeiru baixa kalan ida $50. Ba iha medical check cup mós ba lokál no estranjeiru montante diferensa. Ezemplu, hasai atestadu médiku ba visa ne’e nia folin la hanesan ho ema lokál nian, agora visa nian ba estranjeiru ema ida $51,50.
Vizaun HNGV
HNGV sai instituisaun nasionál referénsia ho fornesimentu kuidadu ospitál nian, ho kualidade, efikásia nu’udar sentru kualidade exelente ho lema: Kualidade di’ak iha serbisu, kompromisu, kompaixaun no koñesimentu.
Misaun HNGV
Hospital Nasionál Guido Valadares nia misaun maka sai ospitál referál multidisplináriu ba fornesimentu kuidadu saúde, ho atividade kompreensivu iha área diagnosa, tratamentu, prevensaun, edukasaun, realibilitasaun no kuidadu kontinuasaun, asegura kada kuidadu pasiente koresponde ba sira-nia nesesidade sira, tuir prátika no klíniku ne’ebé di’ak-liu ho rekursu sira-ne’ebé disponivel.
Atu promove peskiza sientífiku no kolabora ho graduadu antes no depois no profisionál treinamentu iha interese oioin husi médiku espesialista nian ba nasaun nu’udar parte husi sira-nia esforsu atu dezenvolve.
Jornalista : Felicidade Ximenes
Editór : Cancio Ximenes
