DILI, 30 Marsu 2026 (TATOLI)—Komandante Jerál (KomJer) Polísia Nasionál Timor-Leste (PNTL), Komisáriu Asistente Afonso dos Santos, Segunda ne’e, halo vizita ba Unidade Espesiál Polísia (UEP), iha Bairru Pité, hodi haree besik kondisaun no funsionamentu sira.
Komisáriu Asistente Afonso dos Santos, hateten, bainhira membru sira atu ko’alia kona-ba kestaun serbisu Polísia nian tenke hetan autorizasaun husi Komandante Jerál, liuliu atu hili membru UEP sai eskoltu.
“Eskoltu ne’e ita mak determina, eskoltu ne’ebé bem formadu, nia hakarak eskoltu mai treinu lai iha UEP, treinu ramata depois mak koloka,” Afonso dos Santos hateten ba Jornalista sira hafoin vizita edifísiu UEP iha Bairru Pité.
Notísia relevante : PNTL destaka disiplina, profisionalizmu no espesializasaun iha aniversáriu UEP
Nia mós nota katak daudaun ne’e membru UEP barak mak idade avansadu ona, tanba ne’e presiza toma atensaun.
“Ita presiza jerasaun foun, ne’e mak ohin ita ko’alia ho Komandante Unidade Espesiál Polísia, maibé depois mak nia haree, maibé membru Governu hili tuir nia família, isto não existe. Afonso nia tempu laiha Governu mak halo intervensaun iha Polísia laran, ha’u mak Komandante, ha’u mak deside, ida-ne’e mak loos, membru Governu bele propoin, maibé deside ne’e ha’u mak deside la’ós membru Governu,” nia akresenta.
Iha biban ne’e, KomJer husu ba membru sira atu labele kria rasizmu no ko’alia kona-ba polítika, labele kria grupu no familiarizmu.
“Ha’u lakohi rona Komandante ida atu enkontru ho ema polítiku, ha’u rona, ha’u sei hasai,” nia fó hanoin.
KomJer nia objetivu vizita unidade ne’e hodi husu membru sira prepara-an, maski ho membru oituan, maibé iha futuru bele halo serbisu di’ak liután.
“Ha’u sempre iha prioridade, ha’u Komandante foun, ha’u tenke ser prepara didi’ak sira ba futuru,” Afonso katak.
Tuir nia, bainhira mosu buat ruma, unidade ne’e mak sei determina, tanba ne’e KomJer deside atu halo vizita uluk ba UEP molok ba fatin seluk.
KomJer mós husu ba membru sira atu kumpre orden husi Komandu no serbisu tuir irarkia Komandu nian.
“Ha’u hateten ona, ba sé de’it iha Polísia Nasionál Timor-Leste la eziste buat rua, rona orden Komandu nian hotu ona, rona Komandante tanba Komandante mak lidera, nia mak hatene, sira seluk laiha,” nia hato’o.
Fó hanoin mós atu prepara-an fó seguransa ba eventu boot hanesan Eleisaun Prezidensiál iha tinan 2027 no Eleisaun Parlamentár iha tinan 2028.
“Ami preparadu, ha’u sei ko’alia ho ami-nia Ministru para prepara sira ba Eleisaun 2027 no 2028, ne’e tenke ser hakarak ka lakohi, tanba ne’e importante,” nia hato’o.
KomJer durante vizita identifika ona problema no falta fasilidade balun husi UEP, tanba ne’e sei buka meiu hodi rezolve.
“Ha’u identifika ona, maibé ida-ne’e sekrekta, labele ko’alia ho ita-boot sira. Ha’u mai vizita, uluk kedan ha’u iha ne’e, ha’u tenke ser iha obrigasaun, ha’u-nia primeira vizita nune’e tenke ser iha Unidade Espesiál Polísia ne’e para ba futuru kualker asuntu ne’ebé akontese, se kontijente Komandu Munisípiu Dili labele, tenke ser mai ona Komandu Unidade Espesiál,” nia dehan.
Iha fatin hanesan, Komandante UEP, Superintendente Xefe Damiao Correia, haktuir, KomJer Afonso nu’udar antigu Komandante UEP hahú iha tinan 2010.
“Nia hatene muito bem kondisaun Unidade Espesiál, nune’e polítikamente nia hato’o ba Ministru Interiór,” nia katak.
Jornalista : Natalino Costa
Editora : Julia Chatarina
