MANATUTU, 30 Marsu 2026 (TATOLI) – Governu liuhusi Ministériu Justisa garante seguransa jurídika no klaridade regulatória ba investidór sira atu investe ho konfiansa iha Timor-Leste.
Ministru Justisa, Sérgio Hornai, esplika katak Governu hakarak fó garantia ba empreza sira atu investe ka kapitaliza sira-nia osan, nune’e fó apoiu ba diversifikasaun ekonómika, tantu iha nasionál komu iha área rurál sira.
“Ita iha lei estruturante lubuk ida ne’ebé fó konfiansa ba instituisaun Estadu no parseiru sira liuliu ba setór privadu. Ezemplu, lei númeru 1/2003 kona-ba direitu propriedade ne’ebé konstitui situasaun rua mak rai domíniu Estadu no rai pretense direitu partikulár”, Sérgio Hornai hateten.
Nia esplika katak Governu mós iha lei importante sira seluk hanesan lei númeru 8/2017 kona-ba expropriasaun, ne’ebé permite Governu ka setór privadu halo kontratu ba uzu rai partikulár tuir prosedimentu legál.
“Ita mós iha lei númeru 13/2017 kona-ba rejime titularidade tantu domíniu privadu Estadu nomós partikulár sidadaun sira-nian”, nia hatutan.
Ministru subliña katak atu hatene klaru estatutu rai, Ministériu Justisa atualiza ona dadus iha sistema baze dadus nasionál, nune’e sidadaun ka investidór sira ne’ebé hakarak uza ba rezidénsia, negósiu no investimentu ka atividade industriá, Estadu tau nia posizaun hanesan autoridade administrativu hodi bele asegura katak rai hothotu tenke rejistadu.
Nia dehan Governu iha ona sistema kadastrál nasionál ne’ebé konsolidadu no ema hotu ne’ebé hakarak halo investimentu tenke kumpre rekizitu legál sira molok uza rai domíniu Estadu. Ida-ne’e forma ida atu garante seguransa jurídika.
Aleinde ne’e, nia destaka importánsia parseria ne’ebé metin entre Estadu no parte relevante sira atu proteje direitu propriedade, tantu iha domíniu públiku komu privadu. Hodi hateten katak domíniu Estadu nian labele reklama hanesan propriedade privada.
Bazeia ba Dekretu-Lei 36, artigu 14 hateten Ministériu Justisa mak responsavel ba administra rai iha Timor-Leste.
Jornalista: Arminda Fonseca
Editora: Maria Auxiliadora
