DILI, 30 Marsu 2026 (TATOLI)—Komandante Polísia Nasionál Timor-Leste (PNTL) Munisípiu Dili, Komisáriu Asistente Polísia Orlando Gomes, informa, PNTL daudaun ne’e investiga hela sidadaun feto ne’ebé suspeitada tara-an.
Kazu ne’e akontese iha Segunda, tuku 7:00 dadeer, iha área II Surikmas, Suku Bairru Pité, Postu Administrativu Dom Aleixo, Munisípiu Dili.
Sidadaun feto ne’e tara-an ho pozisaun ne’ebé tuur de’it ho tali iha kakorok no laiha ona iis. Nune’e, hafoin akontese Polísia Forense husi Komandu Jerál PNTL halibur kedan evidénsia no lori mate-isin ba Ospitál Nasionál Guido Valadares (HNGV) Dili hodi kontinua prosesa ba Autópsia.
Notísia relevante : PNTL la deteta sinál ofensa hasoru joven feto ida tara-an iha Caraubalu
Ho nune’e, daudaun ne’e Komandu PNTL Munisípiu Dili halo hela investigasaun hodi hatene motivu husi kazu ne’e.
“Ohin investigasaun Dom Aleixo ba atende ona, no liga ba forense sira foti ona mate-isin para lori ba Ospitál Guido Valadares ba halo autópsia no prosesu ne’e sei la’o hela,” Komisáriu Asistente Polísia Orlando Gomes, hato’o ba Jornalista sira hafoin ramata enkontru ho Komandante Jerál PNTL, Komisáriu Asistente Polísia Afonso dos Santos, iha Kaikoli, Segunda ne’e.
Maski nune’e, nia labele adianta informasaun husi kazu ne’e tanba iha hela prosesu investigasaun.
“Ita seidauk hatene motivu husi kazu ne’e tanba sei iha hela prosesu. Sira sei la’o hela,” nia akresenta.
Jornalista : Natalino Costa
Editora : Julia Chatarina
