DILI, 31 Marsu 2026 (TATOLI)–Responsavel Ekipa Legál Estudante Universitáriu Timor-Leste (EUTL), Cristóvão Mauto, informa halakon Lei Pensaun Mensál Vitalísia ne’e maihosi vontade populár no kamada sosiedade hotu-hotu iha Timor-Leste inklui joven sira iha rai-li’ur.
“Tanba ne’e, liuhosi konferénsia imprensa ne’e EUTL hakarak hato’o ba públiku ligadu ho desizaun Tribunál Rekursu (TR) nian ne’ebé deklara konstitusionalidade ba revogasaun Lei Pensaun Mensál Vitalísia ne’ebé Prezidente Repúblika promulga iha tinan 2025 hodi halakon totál. Ita ko’alia atu halakon Lei Pensaun Mensál Vitalísia iha Timor-Leste ne’e, la’ós hanesan vontade polítika sira-nia ne’ebé túr iha PN konvoka reuniaun halo estensaun,” Mauto dehan iha konferénsia imprensa iha Universidade Nasionál Timor Lorosa’e (UNTL), Tersa ne’e.
Notísia relevante: Tribunál Rekursu deside la inkonstituisionál ba revogasaun pensaun vitalísia
Nune’e mós, Portavós Estudante Universitáriu Timor-Leste (EUTL), Tatalício Nunes Martins, dehan maski halakon ona Lei Pensaun Mensál Vitalísia ne’e maibé UETL nafatin firme iha situasaun saida de’it.
“EUTL husu nafatin kontribui ideia no morál hosi parte hotu atu EUTL sira hanesan movimentu akadémiku ka instrumentu akadémiku ne’ebé pozisiona nia an nu’udár movimentu estra-parlamentár hodi luta kontra injustisa, ne’ebé defende interese povu maubere nian,” nia katak.
Jornalista: Osória Marques
Editór: Xisto Freitas da Piedade
