DILI, 31 Marsu 2026 (TATOLI)—Komandante Jerál (KomJer) Polísia Nasionál Timor-Leste (PNTL), Komisáriu Asistente Polísia Afonso dos Santos, prefere rekrtuta membru foun 750.
“Ha’u-nia opiniaun ne’e la’ós 400, maibé iha rekrutamentu hamutuk 750 atu kobre hotu, tanba eleisaun besik ona, tinan 2027 Eleisaun Prezidensiál, 2028 Eleisaun Parlamentár, entaun urjentemente rekruta ne’e la’ós 400 maibé 700 ital para ita garante fatin sira ne’e,” Komisáriu Asisten Afonso dos Santos bainhira halo vizita ba iha Kuartél Unidade Polisia Marrítima, Segunda ne’e.
Biban ne’e, nia garante katak sei halo rekrutamentu efetivu ba membru foun 700-resin.
“Ha’u mak Komandante Jerál nusa mak la garante. Ha’u mak Komandante Jerál ha’u deside ba Ministru hakarak ka lakohi tenke ser nune’e, tanba ezijénsia. Ita hakarak eleisaun di’ak, Eleisaun Prezidensiál di’ak, Eleisaun Parlamentár di’ak, entaun presiza,” nia akresenta.
KomJer komprometidu atubele hadi’a mekanizmu rekrutamentu foun tanba rekrutamentu antes ne’e anula ona.
“Agora tenke ser rekrutamentu mudansa tanba Primeiru-Ministru ko’alia ona, pasadu la autoriza, ita tenke haree kompromisu foun,” nia katak.
Notísia relevante: Polémika rekrutamentu PNTL hein desizaun Konsellu Ministru
Nia promete mós sei hadi’a Komisaun Promosaun ba Ajente inklui Rekrutamentu ba PNTL.
“Komisaun Promosaun mós ha’u hakarak foun hotu, ida tuan ha’u la uza, atu garante labele mosu tan familiarizmu. Rekrutamentu ne’e hotu sei formaliza iha Sentru Formasaun, ida-ne’e mak loos, la’ós foti fali iha Komandu Jerál, ida-ne’e la autoriza,” nia tenik.
Tuir KomJer rekrutamentu foun ne’e presiza hadi’a mekanizmu, nune’e Ministru Interiór tenke aseita.
“Ha’u mak Komandante Jerál nia la aseita saida, hakarak ka lakohi rekrutamentu tenke ser iha Komandu Jerál la’ós iha Ministériu. Iha Ministériu ne’e mak agora sai tiha hanesan ne’e,” nia hato’o.
Hodi hatutan: “Ha’u la fó sala ha’u-nia Ministru. Sala ne’e iha Komisaun tanba ladún sériu halo ida-ne’e, nune’e akontese nune’e. Imi hotu hatene.”
Nune’e KomJer prefere, rekrutamentu foun tuirmai Komandu mak jere no parte Ministériu Interiór tau reprezentante hodi observa prosesu tomak.
“Rekrutamentu ne’e sei hala’o iha sentru formasaun hotu, Sentru Formasaun mak iha poder tomak halo buat ne’e,” nia subliña.
Komisáriu Afonso apoia Primeiru-Ministru, Xanana Gusmão nia preferénsia ne’ebé prefere rekrutamentu foun ne’e tenke aplika sistema eleminatóriu.
Jornalista : Natalino Costa
Editora : Julia Chatarina
