DILI, 31 Marsu 2026 (TATOLI)–Ministru Defeza Kontra Almirante Donaciano do Rosário da Costa Gomes Pedro ‘Klamar Fuik’, hateten, Majór Jenerál Guarda Nasionál Illa Rhode, Estadu Unidu Amérika – EUA, Andrew J. Chevalier, Tersa ne’e, hala’o vizita kortezia hodi hato’o prontidaun hodi intensifika kooperasaun militár entre parte rua.
“Jenerál mai atu intensifika filafali, hare filafali programa bolu SPP (State Partnership programme) ne’ebé mak dezenvolvidu ona entre Timor-Leste ho EUA, nune’e mós ho programa sira seluk iha ámbitu militár ba militár,” Pedro Klamar Fuik hato’o ba jornalista hafoin simu vizita kortezia husi Majór Jenerál Guarda Nasionál Illa Rhode – EUA, Andrew J. Chevalier, iha Ministériu Defeza.
Governante ne’e dehan, Majór Jenerál Guarda Nasionál Illa Rhode EUA, Andrew J. Chevalier mós hato’o prontidaun atu kontinua atividade militár ba militár, iha mós atividade abrajente liu hanesan Governu ba Governu, sosiedade ba sosiedade, iha programa ne’ebé mak atu dezenvolve husi sosiadade ba sosiedade sei iha programa ida bolu SPP ne’ebé mak hanaran Round Island Route sei halo ho Baukau, no husi ne’e naturalmente atividade barak sei dezenvolve.
“Ita fiar katak atividade sira-ne’e hotu sei lori benefísiu mai Timor-Leste,” nia akresenta.
Notísia relevante : TL-Guarda Nasionál Rhode Island hametin kooperaaun bilaterál iha área defeza
Klamar Fuik dehan, Andrew J. Chevalier halo viajen mai Timor-Leste nu’udar parte ida husi amizade, atubele intensifika falifali relasaun amizade ne’ebé mak Timor-Leste iha EUA, liuliu iha programa ne’ebé mak dezenvolve ona.
“Timor-Leste nia independénsia hetan apoiu maka’as husi Senadór sira husi Kongresu Amerikanu, ne’ebé mak loke liman loke odamatan hodi hatete Timor-Leste iha nia direitu atu ukun-an, ida-ne’e mak desizaun EUA foti, no husi ne’e mak relasaun bilaterál no diplomata entre EUA ho Timor-Leste dezenvolve, ein partikulár dezenvolvimentu iha kooperasaun ámbitu militár no defeza intensifika husi atividade barak ne’ebé mak EUA halo iha ita-nia rai, husi formasaun husi atividade enjenaria, ezersísiu ho tan konstrusaun no seluk seluk ne’ebé mak halo,” nia akresenta.
Iha fatin hanesan, Majór Jenerál Guarda Nasionál Illa Rhode – EUA, Andrew J. Chevalier, hateten, parseria entre parte rua hahú dékada hirak liubá antes Timor-Leste nia independénsia.
“Ami valoriza ita-nia parseria ida-ne’e, ami haree ba oin oinsá atu aprofunda liután ita-nia parseria ne’e iha futuru,” nia katak.
Nia haktuir, orseik enkontru ho Prezidente Repúblika, ohin ho Primeiru-Ministru no mai Ministru Defeza, hafoin FALINTIL-Forsa Defeza Timor-Leste (F-FDTL) ne’e ho objetivu atu espanda liután ita-nia parseria entre parte rua la’ós de’it iha área defeza maibé mós ba asisténsia komunitária ne’ebé responde ba dezastre.
“Ami hakarak espanda liután ita-nia parseria ne’e ba povu no nasaun Timor-Leste. Agora oinsá ita atu kria enkuadramentu ba ita-nia parseria ne’e no ba oin espanda liután no hametin liután ita-nia parseria TL ho Round Island”, nia dehan.
Jornalista : Natalino Costa
Editora : Julia Chatarina
