DILI, 31 Marsu 2026 (TATOLI)—Palásiu Prezidénsia Repúblika no Governu, tersa ne’e, hala’o sorumutu plenáriu nível aas ida ho objetivu atu koodena no organiza eventu estratéjiku boot tolu ne’ebé atu realiza iha 2026 ne’e.
Sorumutu ne’e lidera husi Vise-Primeiru-Ministru, Francisco Kalbuadi Lay, nu’udar Reprezentante Governu nian no mós Prezidente ba Komisaun Organizadora, konta mós ho ministériu relevante sira, parseiru dezenvolvimentu no reprezentante husi setór privadu sira.
Xefe Kaza Sivíl Palásiu Prezidensiál, Henriqueta Maria da Silva, hateten enkontru ne’e konsentra iha operasionalizasaun husi akordu institusionál estabelese husi Prezidente Repúblika, José Ramos-Horta no Primeiru-Ministru, Kay Rala Xanana Gusmão.
“Kooperasaun ne’e ho objetivu atu organiza ho susesu Maratona Internasionál Dili 2026, Simeira Siénsia ba DezenvolvimentuNataál kada tinan ho atividade Natál ba Povu (Natal do Povo),” Henriqueta hateten.
Nia dehan, eventu sira-ne’e sai hanesan plataforma estratéjika hodi promove estabilidade nasionál, unidade no prestíjiu internasionál Timor-Leste nian.
Maratona Internasionál Dili, ne’ebé planeia ba 08 Agostu, espera bele dada partisipante na’in-7.000-resin no sei foka espesiál ba konservasaun ambientál no floresta. Iha ámbitu ba preparasaun nian sei iha selesaun nasionál ho meia maratona ne’ebé sei hala’o iha l09 Maiu.
Iha tempu hanesan, Simeira Siénsia ba Dezenvolvimentu sei lori Laureadu Nobel na’in 30 no peritu internasionál sira mai Dili hodi diskute inovasaun no teknolojia, hodi reforsa Timor-Leste nia papél hanesan sentru ba diálugu globál bainhira nasaun ne’e la’o ba oin nu’udar membru plenu ASEAN.
Rezultadu signifikativu hosi sorumutu ne’e mak institusionalizasaun formál hosi projetu boot sira-ne’e iha estrutura permanente governu nian laran. Chefe Casa Civil Henriqueta da Silva esplika katak ekipamentu rejistu eletróniku no kronomitru (timing) modernu ne’ebé sosa ba maratona ne’e sei entrega ba ministériu relevante sira hodi garante kontinuidade profisionál iha tinan oin mai.
Relasiona ho inisiativa “Natal do Povo”, koordenasaun entre Prezidénsia Repúblika no Governu hakarak reforça solidariedade sosiál no hakbesik lideransa polítika ba populasaun, hodi hatudu katak kooperasaun institusionál no harmonia polítika mak pilar fundamentál ba dezenvolvimentu nasionál.
Jornalista : Hortêncio Sanchez
Editór : Cancio Ximenes
