DILI, 31 Marsu 2026 (TATOLI)–Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate Laek, hamutuk ho Majór Jenerál Guarda Nasionál Illa Rhode – Estadu Unidu Amérika (EUA), Andrew J. Chevalier ko’alia kona-ba kapasidade rekursu umanu ba militár FALINTIL-Forsa Defeza Timor-Leste (F-FDTL).
“Ohin ami halo diskusaun oituan, fó segementu ba kooperasaun ne’ebé ita halo ona, programa ne’ebé asina iha tinan 2023 ne’ebé ko’alia kona-ba kursu formasaun no kapasita ita iha sira-nia rai, lian Ingléz, ko’alia kona-ba ezerisísiu konjunta kombinadu multilaterál no bilaterál, ne’ebé hala’o iha ne’e,” Jenerál Falur hateten ba Jornalista sira hafoin halo enkontru ho Majór Jenerál Guarda Nasionál Illa Rhode – EUA, Andrew J. Chevalier, iha ninia knaar fatin, Kuartel Jenerál F-FDTL, Fatuhada.
Biban ne’e, parte rua ko’alia kona-ba apoiu investimentu ba parte lojístika inklui doasaun sira ne’ebé EUA fó kona-ba intalasaun apoiu forsa aérea Baukau.
“Ho meius sira ne’ebé sira fó ninian manutensaun oinsá ami haree, ne’ebé ha’u agradese ba apoiu sira ne’ebé sira fó,” nia tenik.
Tenente Jenerál Falur hatutan, sira ko’alia mós kona-ba dokumentu referensiál ne’ebé Governu fó sai para uniformiza no regula, koperasaun bilaterál hotu-hotu ne’ebé EUA mantein atu fó kapasitasaun ba forsa Komponente Navál Terrestre.
“Mezmu tempu sira mos apoiu ezersísiu ne’ebé halo, liuliu kona-ba dezastre naturál no apoiu umanitáriu. Ne’ebé ita simu ida-ne’e,” nia akresenta.
Notísia relevante : EUA mantein kooperasaun iha área formasaun militár
Jenerál Falur hateten, iha enkontru ne’e mós ko’alia prioridade ne’ebé ita sempre prioriza hanesan rekursu umanu, tanba dezenvolvimentu teknolojia ou mudansa siénsia militár sira. Entaun ita prepara rekursu umanu, ita-nia prioridade mak ida-ne’e,” nia katak.
Iha fatin hanesan, Majór Jenerál Guarda Nasionál illa Rhode – EUA, Andrew J. Chevalier, haktuir, durante ninia vizita, Majór Jenerál Chevalier hasoru malu ho Prezidente Ramos-Horta, Primeiru-Ministru Xanana Gusmão, Ministru Defeza, Xefe Estadu Maiór Jenerál F-FDTL, no Sekretáriu Estadu Protesaun Sivíl hodi ko’alia kona-ba hametin kooperasaun seguransa bilaterál, hasa’e kapasidade resposta ba dezastre no asisténsia umanitária, no habelar oportunidade dezenvolvimentu edukasionál no profisionál.
Konversa hirak ne’e haree liubá hadi’a koordenasaun no resposta entre ajénsia seguransa no emerjénsia Timor-Leste nian, avansa programa formasaun no interkámbiu hamutuk, no promove estabilidade no reziliénsia rejionál iha Indo-Pasífiku.
Majór Jenerál Chevalier mós hamutuk ho ofisiál Governu sira iha serimónia lansamentu ba instalasaun Timor-Leste nia Rede Komunikasaun Rádiu Emerjénsia Nasionál dahuluk, marku istóriku ida ne’ebé sei hametin komunikasaun no koordenasaun entre Polísia Nasionál Timor-Leste, Ajénsia Protesaun Sivíl, F-FDTL, no servisu ambulánsia nian.
Aleinde ne’e, Majór Jenerál Chevalier halo mós vizita ba Muzeu Rezisténsia no Universidade Nasionál Timor-Leste, ko’alia ho estudante sira, profisionál sira ne’ebé foin hahú kareira, no ofisiál militár sira hodi destaka importánsia husi edukasaun no dezenvolvimentu profisionál.
Vizita Majór Jenerál Chevalier nian ne’e reforsa parseria kleur ona entre Estadus Unidus Amérika no Timor-Leste, hodi hatudu kompromisu hamutuk ba seguransa, reziliénsia, no prosperidade iha rejiaun Indo-Pasífiku.
Jornalista : Natalino Costa
Editora : Julia Chatarina
