DILI, 31 marsu 2026 (TATOLI)—Komandante Jerál (KomJer) Polísia Nasionál Timor-Leste (PNTL), Komisáriu Asistente Polísia Afonso dos Santos, Tersa ne’e, halo vizita ba Unidade Polísia Marrítima (UPM), ne’ebé nia parte husu atu membru sira atu serbisu ho orden no responsabilidade.
“Imi serbisu ho dignidade, serbisu ho orden no responsabilidade Komandu. Ha’u hakarak imi serbisu hamutuk ho F-FDTL (FALINTIL-Forsa Defeza Timor-Leste), liuliu Komponente Navál,” Komisáriu Afonso hato’o ba Jornalista sira hafoin vizita Unidade Polísia Marrítima iha Seonál Lesidere.
Nia husu ba Polísia Marrítima atu labele envolve iha atividade ilísitu, hanesan hatama sasán husi Tasi Indonézia mai Tasi Timor.
“Tuir informasaun, Polísia Eskuadra sira maka envolve. Ha’u la rona membru Polísia Marrítima envolve iha laran, ha’u apresia ho ita-boot sira. Tanba ne’e, husu atu ita-boot sira mantein ida-ne’e, ha’u husu ba membru tomak atu serbisu nafatin, hanesan Komandante Jerál sei haree buat ne’ebé imi presiza,” nia akresenta.
Notísia relevante : Empreza sei entrega Postu UPF unidade 50 iha Fevereiru 2026
KomJer komprometidu durante mandatu sei fó prioridade ba unidade tolu hanesan Unidade Espesiál Polísia (UEP), UPM no Unidade Patrulamentu Fronteira (UPF).
“Iha ha’u-nia mandatu, ha’u sei haree liu ba UEP, UPM no UPF, ha’u hakarak unidade tolu bele avansa no dezenvolve iha ha’u-nia mandatu tanba unidade tolu ne’e importante tanba iha situasaun ladi’ak unidade tolu ne’e mak sei halo intervensaun,” Afonso katak.
Aleinde ne’e, KomJer sei tau-matan ba ekipamentu no rekursu iha unidade laran.
“Bainhira ha’u kaer PNTL, unidade tolu tenke avansa, ne’e ita iha rekrutamentu no rekrutamentu ne’e sei tau joven sira para futuru ne’e bein formadu. Ha’u husu ba membru tomak atu serbisu nafatin, hanesan Komandante Jerál sei haree buat ne’ebé imi presiza,” nia adianta.
Komisáriu Asistente Afonso fó hanoin, bainhira iha problema ruma ho populasaun tenke rezolve didi’ak.
“Ha’u lakohi imi-nia liman kona populasaun, Polísia tenke proteje nia komunidade no povu,” nia fó hanoin.
Iha fatin hanesan, Komandante UPM, Superentendente Xefe Eugénio Pereira, haktuir, KomJer nia vizita atu haree kestaun estratejia no situasaun UPM nian.
“Ho vizita ne’e Komandante Jerál foti nia responsabilidade atubele buka solusaun ba difikuldade no dezafiu ne’ebé Unidade Polísia Marrítima iha,” nia tenik.
Problema ne’ebé mak durante ne’e UPM iha mak infrastrutura ba operasaun tanba tuir lei orgánika PNTL nia, UPM sei iha Batallaun ida-ne’ebé mak sei halo serbisu ba operasaun sira iha tasi.
“Tanba ne’e, presiza kria infraestrutura ida-ne’e nune’e ba oin Unidade Polísia Marrítima bele halo serbisu ho di’ak liután,” Eugénio Pereira, hato’o.
Nia deskreve, Timor-Leste nu’udar país izolár ne’ebé iha konsteira, tanba ne’e presiza haree kolokasaun UPM iha área konsteira. Tanba UPM ninian prezensa iha área konsteira iha zona marrítima ne’e aumezmu tempu aprezenta mós Estadu hodi haree kona-ba soberania.
Maski nune’e, kolokasaun ba rekursu rasik seidauk sufisiente maibé fasilidade transporte marrítima daudaun ne’e sufisiente.
“Ita iha Ró Lucitania ne’ebé hahú halo operasaun no ita mós iha ró sira seluk, entan ita buka para depois mellora tan,” nia relata.
Jornalista : Natalino Costa
Editora : Julia Chatarina
