Estudante estajiáriu sira mai prátika iha HNGV tuir regulamentu interna
DILI, 01 Abríl 2026 (TATOLI)—Diretór Servisu Apoiu Diagnóstiku no Terapêutika HNGV, Vidal de jesus Lopes, hateten preokupasaun publiku nian relasiona ona ho estudante estajiáriu sira husi universidade sira mai pratika iha HNGV maibé tuir regulamentu interna ne’ebé mak estabelese ona katak sira la’ós naran kaer pasiente maibé sempre iha orientasaun.
“Estajiariu sira-ne’e la’ós primeiravés mai iha estájiu iha ne’e tanba HNGV mós halo kaordu ka MoU ho universidade no instituisaun sira-ne’e. Entaun, estajiáriu sira-ne’e mai iha ne’e estajiu tuir padraun ka regulamentu interna tuir prosedura ne’ebé mak estabelese ona. Dalaruma estajiadu sira la’ós naran kaer pasiente maibé sempre iha orientasaun,” Vidal Lopes dehan ba jornalista sira iha HNGV, Bidau, ohin.
Nia esplika, iha HNGV ne’e iha xefe departamentu, xefe unidade no ekipa lider edukadór sira mak durante ne’e tau matan ba estajiadu sira, tanba sira mai tenke la’o tuir orden ne’ebé mak iha.
“Iha ne’e xefe sira-ne’e mak durante ne’e tau matan ba estajiadu sira, tanba sira mai tenke la’o tuir orden ne’ebé mak iha hanesan ba haree pasiente ida modelu oinsá ne’e iha hotu no superviziona husi enfermeiru senior sira, tanba ita iha esperiénsia liu ba ita sei kontinua hadi’a,” nia hateten.
Antes ne’e, Diretór Kliniku Hospitál Nasionál Guido Valadares (HNGV), Arcanjo Nunes, hateten HNGV nafatin simu preokupasaun sira-ne’ebé mak pasiente sira hato’o relasiona ho atendimentu sira.
“Ami nafatin simu preokupasaun sira-ne’ebé mak hato’o husi pasiente sira relasiona ho atendimentu liuliu ba sira-ne’ebé la satisfas. Entaun, ita forma keixa saida de’it mak husi pasiente no ita tenke buka tuir nia fukun sira-ne’e husi ne’ebé. Entaun, ita nafatin konsdiera sira-nia preokupasaun,” Arcanjo Nunes dehan.
Tanba, nia dehan, ibainhira iha keixa ruma tenke iha mós evidénsia tanba HNGV hanesan sentru atendimentu tersiáriu ihaTimor-Leste.
“Médiku sira iha HNGV sira mak sai toma responsabilidade direta ba pasiente sira. Insidénsia ruma iha karik, ita presiza atu fó informasaun ne’ebé mak klaru hodi konsulta atu bele hadi’a sasán sira-ne’e. Maibé husi parte diresaun kliniku nafatin simu hodi hadi’a no nafatin fó solusaun, nune’e labele afeta atendimentu ladi’ak ba pasiente, maibé nafatin atende populasaun sira ho di’ak,” nia hateten.
Nia haktuir, estudante sira-ne’ebé halo estajiu iha HNGV hanesan enfermeira, parteira, tékniku aliadu, maibé responsabilidade primeiru ba pasiente ne’e mak espesialista nia liman.
Entaun, nia dehan, espesialista iha dever tomak atu responsabiliza kualker konsuta médika ne’ebé mak halo ba pasiente, depois halo servisu grupu ho médiku jerál sira hodi bele evita kualker tipu máprátika ne’ebé akontese.
Jornalista : Felicidade Ximenes
Editór : Cancio Ximenes
