DILI, 01 Abríl 2026 (TATOLI)—Governu Konstitusionál da-sia (IX) liuhusi reuniaun Konsellu Ministru, kuarta ne’e, aprova $600.000 ba prosesu transladasaun restu mortál (mate-isin) husi preladu katóliku sira-ne’ebé hala’o kna’ar pastorál iha Timor-Leste, husi Portugál maia Katedrál Dili.
Notísia Relevante: Setembru, Governu-Igreja sei halo transladasaun restu mortál bispu Timor na’in-tolu husi Portugál
Projetu Rezolusaun Goveru nian ne’e aprezenta husi Ministru Administrasaun Estatál (MAE), Tomás do Rosário Cabral.
Desizaun ida-ne’e ho objetivu atu garante kondisaun nesesária atui translada restu mortál Dom Jaime Garcia Goulart, Dom José Joaquim Ribeiro, Monseñór Martinho da Costa Lopes no Dom Alberto Ricardo da Silva, husi Portugál mai Katedrál Dili, nu’udar rekoñesimentu ba legadu espirituál, istóriku no nasionál husi figura importante Igreja Katólika nian iha Timor-Leste.
Tanba ne’e, hein katak sira-nia restu mortal (mate-isin) deskansa iha ema sira-ne’ebé sira serbí ba nia leet, nune’e povu bele fó omenajen ne’ebé loos ba sira, nu’udar jestu rekoñesimentu ida ba kna’ar ne’ebé sira hala’o no legadu ne’ebé sira husik hela, ne’ebé hakat liu ámbitu relijiozu no sai parte husi identidade nasionál Timor-Leste nian.
Rezolusaun Governu estabelese enkuadramentu finanseiru atu apoia despeza sira-ne’ebé relasiona ho prosesu transladasaun, no mós serimónia fúnebre no omenajen.
Prevee mós katak obra konstrusaun, rekonstrusaun, reparasaun, rekualifikasaun ka konservasaun ne’ebé nesesáriu iha ámbitu prosesu ida-ne’e sei hala’o hosi Ministériu Obra Públika no Ministériu Planeamentu no Investimentu Estratéjiku (MPIE), ho posibilidade rekursu ba Fundu Infraestruturas ba ninia finansiamentu.
Notísia Relevante: 2026, Igreja-Estadu halo transladasaun restu mortál Dom Martinho husi Portugál mai TL
Jornalista : Alexandra da Costa
Editór : Cancio Ximenes
