OEKUSI, 31 Marsu 2026 (TATOLI) – Ministériu Saúde (MS), tersa ne’e, inaugura sentru maternidade iha sentru saúde Kiomaonteko suku Costa sub-rejiaun Pante Makasar, Rejiaun Administrativa Espesiál Oekusi Ambeno (RAEOA), hodi fasilita inan isin-rua sira bainhira partu bele asesu fatin ho seguru.
Notísia relevante:Konstrusaun uma maternidade iha Sentru Saúde Kiomaonteko sei konklui iha Dezembru
Diretora Jerál Kuidadu Saúde Primária iha Ministériu Saúde, Elizabeth Letomau, infraestrutura ne’e, hetan apoia fundu husi Governu Austrália liuhusi Ajénsia Internasionál DFAT no PhD, tanba ne’e, nia husu atu uza ho responsabilidade liliu mobiliáriu sira.
“Mobiliáriu sira-ne’ebé ohin hetan ona, ne’e apoia husi Governu Sentrál, hahú ohin ba oin, sasán sira-ne’e responsabilidade serbisu saúde Rejionál Oekusi nian, ha’u husu atu asegura nafatin, fatin ida-ne’e, no mós mobiliária sira-ne’ebé ohin ita-boot sira hetan, presiza asegura atu uza iha tinan barak nia laran, no tenke hetan apoia husi autoridade lokál sira,” nia hateten iha ámbitu seremónia inaugurasaun iha Oekusi, ohin.
Nia esplika, mobiliáriu sira-ne’ebé destaka ona, mak hanesan kulsaun, kama, hena, sumasu, ármariu no fasilidade sira-ne’ebé realasaun ho inan partu nian.
Iha biban ne’e, nia enkoraja profisionál saúde sira, hasa’e atendimentu liuhusi promosaun no edukasaun sívika ba inan isin-rua sira liuliu planeiamentu família, nune’e kontribui taxa mortalidade bele tuun.
Notísia relevante:Pasiente 260 sofre moras ISPA no diarreia iha Sentru Saúde Kiumaonteko Pante Makasar
Iha fatin hanesan, Diretór Diresaun Rejionál Administrasaun Oekusi, José Tanesib Anunu, reprezenta Autoridade RAEOA, agradese ba Ministériu Saúde, tanba ho fasilidade sentru maternidade ne’e, bele fasilita serbisu saúde iha sentru saúde Kiomaonteko.
“Agradese ba Ministériu Saúde, tau netik atensaun ba RAEOA, tanba ita hela dook husi sentrál, entaun ita presiza apoia, bele fasilita komunidade sira, mezmu fundu ne’e mai husi parseiru sira, maibé agradese tanba ho ida-ne’e, esforsa husi Ministériu, bele fasilita fasilidade saúde sira iha Oekusi, maibé ita mós tenke prepara ita-nia rekursu sira, bele atende komunidade sira ho di’ak seguru,” nia orgullu.
Notísia relevante:Sentru Saúde Kiomaonteko rejista pasiente ho kazu TBC 79
Entretantu, konstrusaun ne’e nia medida 15×7 kompleta kedas ho sala ualu (8), haris-fatin rua (2), no sala vizita rua (2), neʼebé ezekuta hosi empreza Save Guard Unipesoál Lda ho valór kontratu $85,905.88 ho durasaun serbisu fulan tolu.
Jornalista: Abílio Elo Nini
Editór: Rafael Ximenes de A. Belo
