VIKEKE, 01 Abríl 2026 (TATOLI)—Xefe Suku Builó, Postu Administrativu Ossú, Munisípiu Vikeke, Hélio Ximenes de Fernandes, hateten iha tinan 2026 Suku Builó sei tau prioridade ba konstrusaun mini merkadu ba negosiante sira liuhusi Programa Nasionál Dezenvolvimentu Suku (PNDS).
“Programa PNDS ba tinan 2026 ami tau prioridade ba konstrusaun mini merkadu, atu ami-nia komunidade uza ba bazár tanba durante ne’e ami haree fasilidade (uma-mahon) laiha, entaun sai mós difikuldade ida ba ami-nia komunidade,” Hélio ba TATOLI iha Suku Builó, Kuarta ne’e.
Autoridade suku ne’e subliña, orsamentu PNDS ne’e direitu povu nian nune’e autoridade tenke implementa hodi responde ba ezijénsia komunidade.
“Orsamentu PNDS ba tinan 2026 ne’e aloka ba Suku Builó ho totál rihun $23. Maski ami haree orsamentu ki’ik, maibé husi orsamentu ne’e ami uza ba konstrusaun mini merkadu. Maibé, kona-ba dezeñu tékniku sira mak hatene no medida uma merkadu nian,” nia informa.
Nia dehan, ba konstrusaun mini merkadu ne’e sei benefísia ba populasaun Suku Builó, inklui mós ba suku viziñu sira hanesan Suku Nahareka no Uaibobo no Uabubu tanba daudaun ne’e estrada mós balun di’ak ona.
Tuir planu, nia dehan, mini merkadu ne’e sei konstrui iha resintu sede Suku Builó nian, atu fásil ba komunidade no negosiante sira asesu bá merkadu referidu.
Tuir dadus, populasaun Suku Builó aldeia haat (4) ho totál abitante hamutuk 1.301 no uma-kain hamutuk 288.
Jornalista: Vitorino Lopes da Costa
Editór: Xisto Freitas da Piedade
