BOBONARU, 02 Abríl 2026 (TATOLI)-Eletrisidade Timor-Leste (EDTL) delegasaun territoriál munisípiu Bobonaru sei halo manutensaun ba liña distribuisaun média tensaun (MT) ho baixa tensaun (BT) no halo limpeza jerál ba ai-horis sira iha área Fider II Maliana Vila no Fider III postu administrativu Balibó.
Xefe Unidade EDTL munisípiu Bobonaru, Mário de Jesus Soares, dehan iha Marsu EDTL halo ona serbisu ne’e hahú husi área Loes, Atabae, Batugadé, no Mota-Ain no ohin konklui ona.
“Semana oin ita sei kontinua filafali iha Maliana Vila no Balibó. Ita sei foti fali ahi husi Likisá, nune’e ahi iha fronteira labele mate. Iha Maliana Vila mós ita sei hetan fornesimentu ahi husi Likisá durante semana rua nia-laran. Semana oin ami hahú serbisu iha Maliana Vila, ahi sei mate la’os dehan katak loron tomak, maibé oras rua ou tolu”, nia informa ohin.
Atividade ne’e halo ho objetivu mak atu hadi’a no garante kualidade fornesimentu enerjia elétrika ba kliente sira iha área ne’e no prevene problema tékniku sira hanesan queda enerjia no distúrbiu iha rede distribuisaun.
“Ha’u husu ba kliente sira iha Maliana Vila, Kailaku no Balibó nia kompriensaun. Kuandu ita la halo manutensaun ba ita-nian trafo subestasaun ne’ebé tuan ona, ita sei gasta orsamentu boot no sei hein tempu naruk atu ahi lakan filafali. Husu kliente sira atu kolabora ho ami no pasiénsia, ita-nia kondisaun mak nune’e”, nia hato’o.
Kona-ba Fider I Bobonaru no Lolotoe konklui ona manutesaun ba liña distribuisaun no limpeza no provizoriamente uza hela ahi husi parte munisípiu Ainaru nia.
Notisía relevante: Governu presiza moderniza sistema EDTL iha Bobonaru
Jornalista: Sergio da Cruz
Editora: Maria Auxiliadora
