BOBONARU, 02 Fevereiru 2026 (TATOLI) – Komunidade husu ba Governu atu kria polítika ne’ebé di’ak hodi moderniza sistema Eletrisidade Timor-Leste (EDTL), tanba kada tinan, bainhira tempu udan no anin, eletrisidade sempre mate-lakan, liuliu iha postu administrativu Lolotoe no Bobonaru, iha munisípiu Bobonaru.
Cesário Amaral ne’ebé reprezenta populasaun Lolotoe hatete katak problema ahi ne’e akontese iha tinan barak nia laran no dalabarak enerjia elétrika mate durante loron ida to’o tolu.
“Situasaun ne’e estraga ema nia ekipamentu eletróniku hanesan televizaun, jeleira, no sasán seluk. Ami husu ba Governu atu buka solusaun ida ne’ebé di’ak, moderniza tiha sistema EDTL hodi garante eletrisidade ne’ebé estavel bainhira udan ho anin mai mós ahi kontinua lakan”, Cesário dehan ba Tatoli, iha Maliana, ohin.
Prekupasaun hanesan mós hato’o husi Felicidade de Jesus, na’in ba negósiu ida iha Bobonaru. Nia haktuir katak dezde Janeiru, eletrisidade mate kuaze loron-loron, liuliu udan no anin-boot.
“Ahi mate beibeik, ami-nia sasán sira, hanesan manu-tolun, sosis, no hahán sira seluk ne’ebé tau iha jeleira hetan estragu tanba jeleira la fatuk. Ami sente lakon tanba fa’an sasán ki’ik ne’e estraga. Se bele Estadu halo planu ida di’ak, troka fiu no ai-riin sira ne’e”, nia sujere.
Ho problema eletrisidade ne’e fó impaktu ba atividade ekonómiku no hamosu sentidu inseguransa entre rezidente sira, liuliu iha tempu kalan. “Kalan toba iha nakukun laran ne’e susar. Ami ferik ho katuas ne’e atu sai bá li’ur ta’uk”, nia salienta.
Xefe Suku Sibuni, Ángelo de Jesus, rekoñese kondisaun meteorolójika ne’ebé estremu halo perturbasaun ba liña eletrisidade, inklui ai-riin no fiu sira ne’ebé afetadu husi udan no anin.
Nia hatutan maski ofisiál EDTL sira kontinua serbisu loron no kalan, maibé sira-nia seguransa mós tenke sai preokupasaun primária. “Anin maka’as ita labele obriga funsionáriu EDTL sira hodi serbisu, tanba bele fó perigu ba sira-nia vida”, nia hateten.
Antes ne’e, Supervizór EDTL unisípiu Bobonaru, Mário de Jesus Soares, dehan eletrisidade mate-lakan iha Bobonaru no Lolotoe, tanba postu rua ne’e iha fatin estrema ba anin no bainhira fiu avaria ruma labele normaliza kedas tanba seidauk iha ekipamentu modernu.
“Ita-nia tékniku sira buka nia motivu avaria ne’e ho manual. Sira la’o tama-sai, sa’e ai-riin ida ba ai-riin seluk atu identifika avaria ne’e. Tanba ne’e mak dalabarak ahi lakan fali mós lori prosesu”, nia hato’o.
Antes ne’em, EDTL munisípiu Bobonaru halo ona limpeza jerál ba ai-hun boot ne’ebé ameasa ba kabu média baixa tensaun husi diresaun Maliana bá Bobonaru no Lolotoe atu evita akontese avaria.
Notísia relevante: EDTL Bobonaro esforsu rezolve ahi mate-lakan
Jornalista: Sergio da Cruz
Editora: Maria Auxiliadora
