DILI, 07 Abríl 2026 (TATOLI)–Embaixadór Malázia iha Timor-Leste, Amarjit Sarjit Singh, hasoru malu ikus ho Primeiru-Miniatru, Kay Rala Xanana Gusmão, hodi despede ninia misaun ne’ebé ramata ona durante tinan tolu iha Timor-Leste.
Embaixadór Malázia ba Timor-Leste, Amarjit Sarjit Singh, hateten hafoin halo despedida ho Primeiru-Ministru Timor-Leste, Kay Rala Xanana Gusmão, diskute atu hametin kooperasaun entre Malázia no Timor-Leste atu bele integra didi’ak no efetivamente iha ASEAN.
“Malázia kontinua hametin kooperasaun atu Timor-Leste bele integra didi’ak no efetivamente iha ASEAN,” Orgaun diplomata relata ba jornalista sira iha Palásiu Governu, ohin.
Nia hatutan, kooperasaun entre nasaun rua ne’ebé mós fó kontribuisaun ba konstrusaun infraestrutura hanesan estrada no fasilidade konferénsia, haforsa kapasidade rekursu umanu liuhusi treinamentu ba ofisiál públiku Timor-Leste nian.
Tamba ne’e, nia fó apresiasaun ba Governu Konstitusionál da-sia (IX) nian ba apoiu maka’as durante nia halo mandatu diplomátiku iha Timor-Leste.
“Durante ha’u-nia misaun, nota susesu prinsipál balun, hanesan konkluzaun donasaun rai husi Governu Timor-Leste ba Malázia atu hari’i kompleksu embaixada iha área praia dos Coqueiros, dokumentu direitu rai ne’e konklui ona iha 2024 hafoin prosesu naruk,” nia dehan.
Susesu ne’e hanesan momentu istóriku iha relasaun entre nasaun rua, projeta konstrusaun kompleksu embaixada ne’e sei hahú etapa mobilizasaun inísiu tinan oin, ho objetivu konklui iha 2029 to’o 2030.
Nia hatutan, envolvimentu husi promove Timor-Leste nian iha ASEAN hanesan susesu ne’ebé durante ne’e konklui iha nia mandatu, aleinde iha setór konetividade aviasaun abertura voo aviaun Aero Dili direta entre Dili no Kuala Lumpur mós susesu importante.
Agora, iha aviaun direta tolu kada semana ne’ebé operasaun husi Batik Air, no adisaun aviaun rua kada semana husi Aero Dili.
“Konetividade ne’e fó impulsu ba espasu empreza Malázia atu esplora oportunidade investimentu no negósiu iha Timor-Leste. Ha’u mós observa dezenvolvimentu signifikativu iha Dili iha tinan tolu últimu, inklui konstrusaun halte mikrolet no reparasaun infraestrutura Estrada. Seluk tan mak dezenvolvimentu sosiál ekonomiku Governu nian visivel liu, maske sei hasoru dezafiu balun,” nia dehan.
Nia dehan, Malázia sei kontinua suporta Timor-Leste iha sira-nia esforsu dezenvolvimentu, molok servisu hanesan Embaixadór Malázia ba Timor-Leste, nia hanesan ofisial seniór iha Ministériu Negósiu Estranjeiru Malázia nian, nia hamutuk ho servisu Administrativu no Diplomátiku hosi 2001 no servisu iha nasaun balun inklui Zimbabwe, Kazakhstan no Vietname.
Jornalista : Alexandra da Costa
Editór : Cancio Ximenes
