Governu loke vaga bolsa estudu na’in-100 ba veteranu nia-oan iha Kovalima
KOVALIMA, 07 Abríl 2026 (TATOLI)- Governu liuhusi Ministériu Asuntu Kombatente Libertasaun Nasionál (MACLN-Sigla Portugés, loke vaga ba ema na’in-100 hodi asesu bolsa estudu ba kombatente no Martir nia-oan sira, iha Munisípiu Kovalima.
Sekretáriu CMCLN Munisípiu Kovalima, Fonciano Barreto, dehan loke hela oportunidade vaga bolsa estudu ba kombatente no martir nia oan iha tinan letivu 2026 ne’ebé hahú simu ona dokumentu.
“Vaga bolsa estudu ba kombatente no martír nia oan sira hahú iha loron 23 Marsu 2026 ne’ebé sei taka iha loron 21 Abríl 2026 ne’ebé daudaun ita-nia kombatente no martir nia oan sira hahú submete ona sira nia dokumentu”, Sekretáriu CMCLN , Fonciano Barreto dehan ba jornalista sira iha edifisiu Konsellu Veteranu Kovalima Tabakolot, ohin.
Ministériu Asuntu Kombatente libertasaun nasionál liuhusi rejime atribuisaun bolsa estudu ba kombatente no martír nia oan-sira bazeia ba Dekretu-Lei númeru 8/2009, loron 15 Janeiru.
Vaga bolsa estudu ne’ebé fó oportunidade ba kombatente no martir nia oan sira ne’e ba ensinu primeiru siklu ba to’o iha nivél ensinu superiór rai laran no rai liur.
Dokumentu ne’ebé mak kandidatu sira presiza submete mak hanesan prenxe formuláriu rekerumentu bolsa estudu, foto kopia kartaun eleitorál husi kandidatu, fotokopia Billete Identidade, Sertidaun RDTL ka Batizmu husi kandidatu orijinál, dokumentu ne’ebé komprova kandidatu matrikula eskolár ba tinan letivu 2026 orijinál
Dokumentu ne’ebé komprova aproveitamentu eskolár husi kandidatu iha tinan letivu 2025 ho rezultadu eskolár ida-idak no midia final kaderneta eskolár foto kopia no foto kopia konta bankaria husi kandidatu.
Tuir dadus númeru bolsa estudu nivél estudu ba munisípiu Kovalima hamutuk 100 kompostu husi bolsa estudu primeiru siklu ensinu báziku, bolsa estudu segundu no terseiru siklu ensinu báziku, bolsa estudu ensinu sekundáriu, bolsa estudu ensinu superiór rai laran no ensinu superiór rai liur.
Jornalista: Celestina Teles
Editór:Florencio Miranda Ximenes
