HNGV halo ezaminasaun raiu-xís ba pasiente kada loron 200
DILI, 07 Abríl 2026 (TATOLI)—Xefe Departamentu Radiolojia iha HNGV, Olga Cinza Marques, hateten servisu departamentu Radiolojia iha Hospitál Nasionál Guido Valadares sempre atende pasiente hanesan baibain durante oras 24 nia laran
Nia hateten, kada loron Departamentu Radilojia iha Hospitál Nasionál Guido Valadares halo ezaminasaun raiu-xís ba pasiente sira hamutuk 200.
“Uluk ne’e ita atende pasiente barak, tanba atende tuir planu ne’ebé iha maibé kle’ur. Maibé agora la’e pasiente mai ohin, sira planu ba aban hasai raiu-x, ne’ebé loron ida ami atende pasiente kuaze 200 kada loron hodi halo ezaminasaun raiu-x,” Olga Cinza Marques hateten ba jornalista sira iha sala Radiolojia HNGV, ohin.
Nia afirma, Departamentu Radiolojia iha Unidade haat, ida raiu xís, (USG) Ultrasonigrafi, (CT-Scan) Computer tomografi scan no (MRI) Magnetic Resonance Imajen.
Antes ne’e, Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, informa relasiona ho família pasiente preokupa kona-ba mákina rau-x ne’ebé mak iha Hospitál Nasionál Guido Valadares dehan aat, mais atu hateten katak daudaun ne’e mákina funsiona hela.
“Mákina ba hasai raiu-xís laiha problema, mákina ne’e agora ami hola tan foun rua mak iha. Mákina raiu-xís ne’e agora ita bele dehan haat mak agora atende hela pasiente sira,” Vidal de Jesus esplika.
Nia dehan, mákina haat ne’e mákina rua foun rua tuan ona, hodi atende pasiente sira bainhira hasai raiu-xís, ne’ebé ba mákina sira-ne’e laiha problema kontínua funsiona.
“Iha departementu radiolojia makina sira-ne’e funsiona hela, ba raiu-xís ka USG, mákina sira-ne’e manutensaun mós la’o no foun mós la’o, ne’ebé laiha problema. Máakina hasai raiu-xís la’o hela, la’ós pasiente mai hein aban mak hasai rezultadu laiha. Bainhira, ohin, médiku ho doutór sira indika hasa’i kedas raiu-xís, agora kedas familia akompaña hasai kedas raiu-xís. Ne’ebé, iha mákina haat mak agora funsiona hela iha departementu radiolojia hodi atende pasiente sira durante 24 oras,” nia dehan.
Kona-ba mákina foun rua ne’e foin halo instalasaun iha sala radilojia ne’ebé laiha mákina atu ida mak avaria.
“Mákina raiu-xís rua ne’e foin instala hotu iha tinan ida-ne’e, agora servisu la’o hela iha departementu radiolojia nune’e laiha mákina ida avaria,” nia dehan.
Jornalista : Felicidade Ximenes
Editór : Cancio Ximenes
