Ministériu Públiku notifika Xefe Suku Afasa relasiona ho atividade PNDS
BAUKAU, 07 Abríl 2026 (TATOLI) – Ministériu Publiku liuhusi Prokuradoria Repúblika fó-sai karta notifikasaun ba Xefe Suku Afasa, Joaquim Fernandes Ximenes, nu’udar sasin ba implementasaun atividade regulár Programa Nasionál Dezenvolvimentu Suku (PNDS) ne’ebé hala’o iha tinan-2023.
Suku Afasa, lokaliza iha postu administrativu Kelikai Antigu, Munisípiu Baucau.
Karta notifikasaun referida Ministériu Públiku fó-sai ho numéru NUC 0019/26 PGGCC, seksaun Gabinete Kombate Korrupsaun no Kriminalizasaun Organizada (GCCCO, sigla portugés) haruka katak ofisiál justisa haruka notifikasaun ba Xefe Suku Afasa, Joaquim Ximenes hamutuk ho sidadaun rua seluk hanesan Carlos Filipe Ximenes no Eurico X. Filipe Belo atu prenzensa GCCCO hodi halo inkrisaun nu’udar testemuña iha oras 09:30, loron 10 Abríl 2026.
Nune’e, Xefe Suku Afasa, Joaquim Ximenes, hateten karta notifikasaun referida nia hetan husi MP relasiona ho prosesu implementasaun projetu reabilitasaun estrada iha Aldeia Uligata husi área Loibalari ba Budefu ho distÁnsia metru 600 nu’udar atividade regulár PNDS iha tinan 2023.
“Ida-ne’e ami hanesan testemuña, sira mai aprosimasaun atu ami atu deklara ba MP katak estrada ne’ebé halo liuhusi orsamentu PNDS ne’e liuhusi prosesu legál ka lae, iha relatóriu ka lae, ne’e mak husu ami atu halo klarifikasaun,” Xefe Suku Afasa Joaquim Ximenes, ko’alia iha Vila nova, Tersa ne’e.
Iha karta notifikasaun referida bazeia ba Kódigu Prosesu Penál (CPP, sigla portugés), Kapítulu III, artigu 92° kona-ba notifikasaun nia forma ne’ebé orienta sna’in-tolu atu inkéritu relasiona ho projetu reabilitasaun estrada rurál iha suku Afasa.
Karta notifikasaun ne’e mós mensiona bainhira falta ka laiha informasaun iha loron ne’ebé fó-sai sei hetan konsensaun ho pena multa no sujeita ba detensaun ho tempu ne’ebé nesesáriu hodi hala’o dilijénsia ne’ebé temi ona bazeia ba CPP artigu 90 kona-ba falta ba aktu prosesuál.
Entretantu, Autoridade suku liuhusi Konsellu Suku deside implementa atividade regulár PNDS hodi reabilita estrada iha área Loibalari ba Budefu ho distánsia metru 600 iha tinan 2023 ho totál orsamentu $28.000.00 ho tipu cor simentu.
Jornalista: Natalino Belo
Editór: Evaristo Soares Martins
