DILI, 07 Abríl 2026 (TATOLI)–Organizasaun Mundiál Saúde (OMS) entrega livru didátiku saúde no edukasaun fízika ba Ministériu Edukasaun (ME) hodi permite prosesu aprendizajen ba estudante sira iha eskola.
“Ami ofisialmente entrega livru manuál kona-ba saúde no edukasaun fízika ba Ministériu Edukasaun tanba livru ne’e importante tebes atu estudante ensinu báziku terseiru siklu. Bainhira joven ida hetan livru didátiku ho kualidade, saúde importante ba estudante iha fururu,” Reprezentante OMS ba Timor-Leste, Arvind Mathur, hateten iha serimónia entrega livru iha ME, Vila-Verde, Tersa ne’e.
Nia subliña, importánsia husi livru sira-ne’e la’ós iha impresaun, maibé forma kompreensaun no hahalok inklui hanesan livru manuál ida lori aprendizajen ne’e ba uma. Bainhira estudante ida lori nia livru ba uma, ida-ne’e ajuda nia fahe informasaun vitál kona-ba nutrisaun, ijiene, tabaku no moris saudável ho família.
Livru manuál sira kona-ba saúde no edukasaun fízika ba klase 7 no klase 8 nian, ne’ebé imprime hamutuk 55.884 no planu sei kopia tan livru saúde klase 7 nian hamutuk 75.000.
Notísia relevante : Profesór iha EBC Camnasa enfrenta problema livru ba matéria dedátiku
Nune’e mós, Ministra Edukasaun, Dulce de Jesus Soares, hateten, ME prepara estudante sira moris saudável iha situasaun reál iha Timor-Leste.
Tuir Ministra, saúde mak parte ida-ne’ebé importante tebes iha kurríkulu maski dala barak ema ladún fó atensaun no foka ba matéria sira-ne’ebé konsidera hanesan sériu liu hanesan portugéz no matemátika.
“Tanba ne’e mak serimónia entrega livru saúde no edukasaun fízika ba klase 7 no 8. Iha aula saúde nian, estudante sira aprende buat ne’ebé esensiál kona-ba moris ne’ebé saudável nu’udar individuu, família, komunidade no nasaun. Ita-nia kurríkulu saúde mak olístiku la’ós de’it saúde fízika, maibé kobre mós saúde sosiál, emosionál no saúde komunidade nian,” Ministra akresenta.
Iha aula saúde nian, estudante sira sei aprende atu ajuda sira-nia família prevene moras, maibé mós iha aula saúde nian estudante sira aprende kona-ba ábitu han ne’ebé nutritivu no auto-imajen ba korpu, oinsá atu harii no mantein relasaun ne’ebé pozitivu, no oinsá atu proteje-an hosi ameasa online no cyber bullying.
Tanba ne’e, saúde no ben-estar mak matéria ne’ebé importante tanba prepara estudante sira atu moris ho saudável iha situasaun mundu reál oioin.
OMS fó apoiu ba impresaun livru sira-ne’ebé iha ona. Livru Saúde no Edukasaun Fízika klase 7 nian distribui ona diretamente ba eskola sira. Livru sira-ne’e mak livru dahuluk ne’ebé to’o iha eskola sira iha munisípiu hotu.
“Maski ita uza ona biblioteka dijitál no koko atu garante asesu online ba ita-nia materiál didátiku hotu, maibé sei difísil nafatin ba profesór ida atu hanorin se laiha livru. Tanba ne’e, apoiu ba impresaun no distribuisaun livru sira-ne’e ajuda tebes. Nune’e livru saúde nian ba klase 8 mós sei imprime hela daudaun, ka karik mai ona. Ida-ne’e importante tebes, tanba ita sei iha livru klase 8 no 9 ne’ebé seidauk imprime iha tinan ne’e. Tanba ne’e, apoiu ba imprime livru mak apoiu ne’ebé ministériu presiza duni,” nia katak.
Jornalista : Osória Marques
Editora : Julia Chatarina
