DILI, 08 Marsu 2026 (TATOLI)-Sekretáriu Estadu Komunikasaun Sosiál, Expedito Loro Dias Ximenes, hateten reuniaun Konsellu Ministru kuartu ne’e, delibera hodi fó autoriza Ministra Finansa, Santina Cardoso atu asina akordu subvensaun rua ho Ajénsia Kooperasaun Internasionál Korea (KOICA) ba projetu rua.
Sekretáriu Estadu Komunikasaun Sosiál, Expedito Loro Dias Ximenes, esplika projetu rua referidu mak hanesan kona-ba Dezenvolvimentu Kapasidade Restaurasaun Florestál no Jestaun Sustentável iha Timor-Leste (2026–2033, no mós Programa Integradu Nutrisaun no Seguransa Alimentár, Alimentasaun Eskolár, Fortifikasaun Alimentár, Fortifikasaun Ai-han no Infraestrutura Eskolár sira (2026–2030).
Nia esplika, projetu restaurasaun floresta ne’e, ho subvensaun prevee millaun $6 no durasaun tinan neen, kobre munisípiu Baukau no Manatutu.
“Ninia objetivu maka reforsa prevensaun ba degradasaun ambientál no promove rekuperasaun ekosistema florestál sira, liuhusi modernizasaun sentru viveiru nasionál, implementasaun programa reflorestasaun, no mós kapasitasaun instituisoins públikas no komunidade lokál sira”, Expedito Dias Ximenes hateten iha Palásiu Governu hafoin ramata reuniaun Konsellu Ministru.
Autoridade governativa ne’e subliña, liuhusi projetu ne’e prevee mós envolvimentu diretu husi tékniku no funsionáriu públiku, no mós partisipasaun ativa husi komunidade sira iha jestaun sustentável ba floresta.
Nune’e iha programa nutrisaun no seguransa alimentár, ho orsamentu millaun $7,2 no ho durasaun tinan lima, sei implementa iha munisípiu Baukau, Bobonaru, Manufahi, no Vikeke.
Nia esplika, projetu ida-ne’e ho objetivu atu hadi’a kondisaun ai-han no nutrisaun eskolár liuhusi reforsa infraestrutura no ekipamentu dapur eskolár, implementa sistema jestaun no monitorizasaun, fortifikasaun ai-han, no mós promove kadeia fornesimentu bazeia ba produsaun agríkola lokál.
Nia adianta, projetu referidu inklui mós formasaun ba profesór sira, pesoál estabelesimentu ensinu nian, no komunidade sira, no mós apoiu ba dezenvolvimentu agrikultura lokál hodi fornese ba eskola sira.
Jornalista: Arminda Fonseca
Editór: Rafael Ximenes de A. Belo
