DILI, 08 Marsu 2026 (TATOLI)-Governu liuhusi reuniaun Konsellu Ministru kuarta ne’e, aprova ona projetu Rezolusaun Governu hodi nomeia Duílio Marino Gusmão Araújo da Silva hodi troka Arcanjo da Silva nu’udar Diretór Ezekutivu ba Ajénsia Promosaun Investimentu no Esportasaun Timor-Leste, Institutu Públiku, ka TradeInvest Timor-Leste.
Sekretáriu Estadu Komunikasaun Sosiál, Expedito Loro Dias Ximenes, hateten proposta referida aprezenta husi Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay.
Nia hateten eis-Diretór Ezekutivu Arcanjo da Silva nia mandatu rasik termina ona iha 2025 maibé fó tan tinan ida, nune’e ohin Governu deside nomeia Duílio hodi troka sai Diretór Ezekutivu ba Tradeinvest.
Nia subliña, nomeasaun ne’e bazeia ba kompeténsia téknika no aptidaun ne’ebé hatudu ona ba kargu ne’e, ba mandatu tinan tolu, iha rejime eskluzividade.
Duílio Marino Gusmão Araújo da Silva hala’o knaar nu’udar Diretór Adjuntu iha TradeInvest Timor-Leste dezde tinan 2019, antes ne’e okupa ona kargu sira nu’udar Diretór Promosaun Esportasaun, Jerente Promosaun Esportasaun, no mós Jerente Relasaun Esterna no Marketing.
Jornalista: Arminda Fonseca
Editór: Rafael Ximenes de A. Belo
