DILI, 08 Abríl 2026 (TATOLI)–Bispu Dioseze Baukau, Don Leandro Maria Alves, hateten, Komisaun konjunta entre Governu no Igreja halo ona kontaktu ho ekipa iha Portugal ba prosesu transladasaun restu mortál Bispu na’in-tolu mai Timor-Leste.
“To’o momentu ida-ne’e iha ona koordenasaun entre Estadu ho Igreja, hahú halo preparasaun oinsá atu translada mai Timor-Leste. Tanba ita iha ona Komisaun ba translada. Tanba momentu ita enkontru ho Primeiru-Ministru indika ona Komisaun husi Governu no Igreja. Ita mós kontaktu ona ho sira iha Portugal oinsá para translada mai to’o Timor-Leste,” Don Leandro hato’o ba jornalista sira, iha Palásiu Governu, Kuarta ne’e.
Antes ne’e, Governu liuhusi reuniaun Konsellu Ministru aprova $600.000 hodi halo preparasaun ba prosesu transladasaun.
Notísia relevante : Governu aprova $600.000 ba transladasaun restu mortál bispu na’in-tolu husi Portugál mai Dili
Desizaun ida-ne’e ho objetivu atu garante kondisaun nesesária atu translada restu mortál Don Jaime Garcia Goulart, Don José Joaquim Ribeiro, Monseñór Martinho da Costa Lopes no Don Alberto Ricardo da Silva husi Portugal mai Katedrál Dili, nu’udar rekoñesimentu ba legadu espirituál, istóriku no nasionál husi figura importante Igreja Katólika nian iha Timor-Leste.
Tanba ne’e, hein katak restu mortál (mate-isin) deskansa iha ema sira-ne’ebé sira serbí ba nia -e’et, nune’e povu bele fó omenajen loos ba sira nu’udar jestu rekoñesimentu ida ba knaar ne’ebé sira hala’o no legadu ne’ebé sira husik hela, ne’ebé hakat liu ámbitu relijiozu no sai parte husi identidade nasionál Timor-Leste.
MAE no Embaixadór Portugal prepara prosesu transladasaun
Ministériu Administrasaun Estatál (MAE) no Embaixadór Portugal antes ne’e hala’o reuniaun kona-ba preparasaun transladasaun restu mortál Prelados Katólika ne’ebé hala’o sira-nia knaar pastorál iha Timor-Leste.
Iha diskusaun ne’e, parte rua foka liu ba koordenasaun ba transporte aéreu husi Portugal mai Timor-Leste no asuntu relevante seluk, ne’ebé sei realiza iha semana ikus Fulan-Agostu no Fulan-Setembru tinan ne’e.
Preparasaun ba transladasaun restu mortál Preladu Katóliku ne’ebé hala’o sira-nia knaar pastorál hamutuk ho povu timoroan iha Timor-Leste mak hanesan, Dom Jaime Garcia Goulart, ne’ebé hanesan Bispu dahuluk hala’o knaar pastorál iha Timor-Leste husi tinan 1945 to’o 1967, no Dom José Joaquim Ribeiro, nu’udar Bispu daruak Dioseze Dili husi tinan 1967 to’o 1977, no Monsenhor Martinho da Costa Lopes, nu’udar timoroan dahuluk hanesan Administrador Apostóliku Dioseze Dili husi tinan 1977 to’o 1983, sira-nia restu mortál haloot iha Portugal, no Dom Alberto Ricardo da Silva nu’udar Bispu Dioseze Dili husi tinan 2004 to’o tinan 2015, nia restu mortál haloot iha Semitériu Maloa.
Prosesu ba transladasaun restu mortál Misionáriu na’in-tolu husi portugal mai Timor-Leste.
Komisaun responsável ba Prosesu Transladasaun Restos Mortais husi Governu sei responsabiliza ba knaar operasional sira mak hanesan lojístiku, administrativu, finansa no aprovizionamentu tuir despaixu Primeru-Ministru, Kay Rala Xanana Gusmão nú. 005/PM/III/2026, ne’ebé públika iha loron 02 Marsu 2026, ne’ebé mak sei serbisu hamutuk ho ekipa Komisaun Organizadora husi parte Igreja hodi bele realiza ho di’ak iha prosesu tomak transladasaun nian.
Jornalista : Osória Marques
Editora : Julia Chatarina
