OEKUSI, 08 Abríl 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA) interinu, Celestinho Martinho Marques, kuarta ne’e fó sai katak, sei la autoriza funsionáriu termu-sertu sira inklui asesór nasionál no internasionál atu kontinua tama serbisu, bainhira simu ona notifikasaun, tanba kontratu termina ona iha loron 31 Marsu 2026.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Celestinho Martinho Marques, informa rekomendasaun ne’e, perante enkontru dahuluk ho Diretór Diresaun Rejionál sira no Xefe Departamentu inklui jestór sub-rejiaun haat, iha salaun administrasaun Numbei, Oekusi, ohin.
“Kontratadu sira-ne’ebé mak cesa ona sira-nia kontratu iha 31 Marsu, inklui asesór, sira labele kontinua tama serbisu ona, tanba tuir lei ne’e laiha ona relasaun ho sira, kontratu hotu para, ita sei haree prosesu tuir ba oin oinsa, ne’ebé ha’u sei la autoriza sira tama serbisu,” nia hateten ba Diresaun Rejionál no Xefe Departamentu sira iha salaun administrasaun Numbei, ohin.
Tanba ne’e, nia husu ba kargu xefia sira, atu informa ba funsionáriu termu-sertu ne’ebé termina kontratu, atu labele autoriza tama serbisu no fó serbisu ou selebra kontratu foun, bainhira laiha koñesimentu ba Prezidente Autoridade subsituisaun.
“Kargu xefia sira labele fó tempu ba sira atu mai serbisu, tanba osan iha ne’ebé atu selu sira, sei sira mai nafatin ba oin ita kontratu fali ema seluk, sira la kontratu entaun sei mosu problema boot, sá tan mai fó tan serbisu ba sira, orsida sei ejize nafatin nia direita tanba presta ona serbisu ba Estadu, ne’ebé kuandu sira tenke informa ba sira, atu labele tama serbisu ona,” nia apela.
Notísia relevante:Atividade tolu iha administrasaun Oekusi paradu, hafoin funsionáriu 60 notifikadu
Nune’e ba asesór sira, tantu nasionál no internasionál, bainhira kontratu termina ona iha loron 31 Marsu 2026, presiza hamamuk ona fatin no labele tama serbisu, “Agora osan laiha, ita ulun fatuk moras, atu buka osan iha ne’ebé mak atu selu sira, ita hein de’it ekipa auditória mai atu hatan oinsá, diretór sira tenke tegas, serbisu kumpre de’it ba lei, labele uza fuan hodi hatama ema barak,” nia hateten.
Notísia relevante:Celestinho Marques PA interinu RAEOA
Jornalista: Abílio Elo Nini
Editór: Rafael Ximenes de A. Belo
