OEKUSI, 10 Juñu 2026 (TATOLI) – Ministériu Agrikultura Pekuária Peska no Floresta (MAPPF), kuarta ohin, oferese fasilidade agríkola hamutuk unidade 19, hanesan tratór-liman (hand-tractor) 10, mákina ko’a hare rua, mákina kuda hare lima no tratór boot rua, ba Autoridade Rejiaun Administrativa Espesiál Oekusi Ambeno (RAEOA) hodi fasilita grupu agrikultór sira liliu natar na’in-sira iha Oekusi.
Ministru Interinu MAPPF, Domingos da Conçeição dos Santos, informa objetivu husi distribuisaun ekipamentu hirak-ne’e atu moderniza setór agrikultura liuhusi investimentu propriadu ba melloria hasa’e produsaun liliu hare.
Tanba ne’e nia espera katak ho atribuisaun ekipamentu hirak-ne’e, bele fó korajen no motivasaun ba agrikultór sira, hodi kontinua atividade natar no hasa’e tan númeru agrikultór, tanba Governu hakarak moderniza ona serbisu agrikultór sira-ne’ebé antes ne’e utiliza de’it karau no liman hodi halai natar.
“Ekipamentu sira-ne’e, bele ajuda ona ita-nia agrikultór sira atu konsentra hodi hasa’e produsaun, tanba ekipamentu sira-ne’e hanesan fatór inspiradór atu motiva sira oinsa bele halo atividade agrikultura boot liután iha Oekusi,” nia hateten iha suku Cunha sub-rejiaun Pante Makasar.
Iha biban ne’e, nia rekomenda ba autoridade RAEOA, bainhira atribui ba grupu agrikultura sira, presiza garante utilizasaun ho responsabilidade, hodi uza ba tempu-naruk.
“Labele ohin ita entrega bairua foin utiliza seidauk iha rezultadu aat ona, entaun ami husu atu atribui ba grupu karik, nafatin halo monitorizasaun, tenke fó asisténsia didi’ak husi tékniku estensionista suku, tanba atu responsabiliza ba sasán sira ho di’ak ba nia sustentabilidade, hothotu tenke sai matan, tilun au fó korajén bai ta-nia agrikultór sira,” nia apela.
Notísia relevante:MAPPF kolleta hare membramo ektare 45 ho mákina modernu iha Pante Makasar
Diretór Serbisu Rejionál Agrikultura Oekusi, José Oqui, agradese ba Ministériu Agrikultura, tanba Oekusi iha potensialidade natar ne’ebé luan, ho totál área natar hamutuk ektare 5.705 no esforsu sira no apoiu husi Autoridade RAEOA hadi’a no rehabilita kanál irrigasaun sira, to’o agora konsege utiliza ona área hamutuk ektare 2.862, benefísia uma-kain 9.711.
Maske nune’e, nia dehan, sei iha área natar ektare 2.845 seidauk utiliza ba área kultivasaun, tanba ne’e, Autoridade RAEOA liuhusi Serbisu Regionál Agrikultura kontinua esforsa atu aumenta área kultivasaun ba tinan tuirmai.
“Iha époka Primeiru tinan ne’e, agrikultór sira konsege realiza kultivasaun ba área natar ektare 1.802, komposta husi sistema PAD ou kuda tuir liña ektare 630 no sistema konvensionál ektare 800, sistema tradisionál ektare 372. Iha époka daruak ne’ebé sei hahú entre fulan-Juñu no Jullu, ami prepara ona área kultivasaun hamutuk ektare 1.060,” nia hateten.
Jornalista: Abílio Elo Nini
Editór: Rafael Ximenes de A. Belo
