DILI, 09 Abríl 2026 (TATOLI)—Ministériu Edukasaun (ME) no Embaixada Japaun iha Timor-Leste, Kinta ne’e, halo sorumutuk hodi ko’alia kona-ba hametin kooperasaun iha área infraestrutura, bee-moos enerjia renovável no dezenvolvimentu edukasaun iha Timor-Leste.
“Sorumutuk ida-ne’e ami halo diskusaun kona-ba edukasaun. Ha’u foun, entaun ha’u hato’o ba Ministra Edukasaun relasiona ho koñesimentu sira ne’ebé mak durante ne’e implementa ona liuhusi suporta finansiamentu husi Governu Japaun,” Embaixadór Japaun, Yamamoto Yasushi hato’o ba jornalista sira iha salaun VIP ME, Vila-Verde, Kinta ne’e.
Yamamoto haktuir, durante enkontru ne’e Ministra Edukasaun informa ba nia kona-ba difikuldade ne’ebé mak parte edukasaun sira hasoru.
“Husi ne’e ba oin ha’u bele serbisu hamutuk liután ho Timor-Leste iha parte edukasaun nian,” nia akresenta.
Nia subliña, durante ne’e Governu Japaun hala’o ona konstrusaun ba eskola hamutuk 50-resin iha Timor-Leste.
“Ami mós haruka voluntáriu foin-sa’e sira hodi ajuda Ministériu Edukasaun hanorin iha eskola sira, liuliu matéria matemátika no edukasaun sívika nian, projetu ne’e mós sei kontinua nafatin. Aleinde ne’e, nia dehan iha tempu badak sira mós sei apoiu foos ba programa merenda eskolár liuhosi WFP,” Embaixadór katak.
Notísia relevante : Fundadór eskola negósiu Hendrik Halbe planeia rekruta timoroan 30 eskola iha Olanda
Voluntáriu hamutuk 25 kompostu husi 15 ba área edukasaun, na’in-lima ba área apoiu atividade juventude nomós na’in-lima seluk ba área seluk. Iha Parte edukasaun nian na’in-ualu ba ensinu báziku, na’in-haat ba edukasaun no desportu nian no na’in-ida ba matemátika nomós na’in-rua ba lian Japaun.
Yamamoto relata, iha eskola hamutuk 350 iha munisípiu Dili, Lautein, Kovalima no Aileu ho nia totál orsamentu ba projetu ne’e hamutuk millaun $6.
Nune’e mós, Governu Japaun oferese ona bolsa estudu ba estudante sira ba nível superiór nian, liliu ba mestaradu. Maibé daudaun ne’e bolsa estudu hamutuk 140 relasiona ho númeru ne’e iha Fulan-Marsu no halo ona resepsaun iha Embaixada hodi halo despedida ba bolseiru sira.
Iha fatin hanesan, Ministra Edukasaun Dulce de Jesus Soares, agradese ba Embaixada Japaun iha Timor-Leste tanba ajuda harii ona eskola hamutuk 50 iha territóriu. Iha voluntáriu hamutuk 12 eskola iha munisípiu ne’ebé konserta liu ba matéria matemátika.
“Prosesu ne’e la’o tinan-tinan no ita halo ona kooperasaun ho sira hodi harii eskola hamutuk 50 iha territóriu,” nia tenik.
Jornalista : Osória Marques
Editora : Julia Chatarina
