BAUKAU, 10 Abríl 2026 (TATOLI) – Programa Nasionál Dezenvolvimentu Suku (PNDS) liuhusi atividade regulár iha Suku Gariuai, Postu Administrativu Baukau Vila, Munisípiu Baukau, sei kanaliza bee-mos ba komunidade iha aldeia Maukale.
Xefe Suku Gariuai, Arlindo Belo Freitas esplika desizaun referida Autoridade suku deside liuhusi Reuniaun Konsellu suku liuliu normaliza hikas kanál bee ne’ebé antes ne’e koneksaun ba tanki rezervatóriu tanba durante tinan barak hetan estragu.
“Tuir planu fulan oin hahú ona tanba semana-oin ami enkontru ikus antes loke kuotasaun,” Xefi suku Gariuai hateten iha Vila Antiga, Sesta ne’e.
Arlino Freitas relata, atividade PNDS ne’e sei hahú hadi’a no troka pipa ba kanu ne’ebé hetan estragus hodi afeta ba volume bee menus no konstrui tanki rezervatóriu rua, iha-ne’ebé distánsia purvolta kilómetru rua.
Alende ne’e, Suku Gariuai tinan-ne’e hetan hetan fundu adisonál hodi reabilita estrada husi diresaun aldeia Gariuai ba Maukale ho distánsia kilómetru ida nune’e fasilita asesu ba fatin turizmu Niki nune’e komunidade bele iha rendimentu bainhira vizita husu turista.
“Ami foku ba Maukale tanba komunidade iha aldeia ne’ebé difisil asesu bee-moos,” Arlindo Freitas akresenta.
Suku Gariuai tinan-ne’e hetan alokasaun orsamentu husi PNDS hamutuk rihun $64 ne’ebé fahe ba atividde regulár kanaliza bee-moos hamutuk rihun $32 no adisonál rihun $32 hodi reabilita estrada iha-ne’ebé utiliza ba fundu infraestrutura no operasionál.
Entretantu, suku Gariuai hamutuk aldeia ualu kompostu aldeia Gariuai, Uaturau, Maukale, Cailiri, Uaibe-ana, Uatu-wa, Bahamori no Darasula ho totál populasaun 6.988 hosi uma-kain 1.694
Jornalista: Natalino Belo
Editór: Evaristo Soares Martins
