DILI,10 Abríl 2026 (TATOLI)—Polísia Nasionál Timor-Leste (PNTL) asegura sidadaun ida ho insiál A tanba suspeitadu envolve iha atividade ilísitu ba atendimentu dokumentu ofisiál Estadu nian.
Servisu Investigasaun Kriminál simu informasaun husi ema sira ne’ebé sai vítima ba suspeitu nia hahalok, nune’e Diresaun Nasionál Servisu Investigasaun Kriminál (DNSIK), iha Kuarta (08/04), hamutuk Pesoál Intelejénsia observa kedan suspeitu ne’e nia movimentu no iha Sesta ne’e maizumenus tuku 9:00 dadeer, iha área Taibesi, konsege asegura kedan suspeitu ne’e ho fraglante delitu tanba halo nia asaun iha instituisaun balun.
Hafoin Polísia halo atuasaun ba sidadaun ne’e, lori kedan bá Servisu Nasionál Investigasaun Kriminál iha Kuartél Jerál PNTL hodi submete ba prosesu identifikasaun.
“Ohin Diresaun Nasionál Servisu Investigasaun Kriminál asegura sidadaun balun tanba sidadaun ne’e públika informasaun bele trata dokumentu ofisiál nasaun nian hotu, Billete Identidade, Sertidaun Moris, Rejistu Kriminál, Pasaporte, Karta Kondusaun no seluk seluk tan,” Diretór Servisu Investigasaun Kriminál, Superintendente Xefe Polísia, João Belo dos Reis, informa ba Jornalista sira iha ninia knaar fatin, Kuartel Jerál PNTL, Sesta ne’e.
Notísia relevante : Membru PNTL no Forsa Armada envolve kazu ilísitu iha fronteira submete ba prosesu judisiál
Polísia daudaun ne’e asegura hela suspeitu tanba iha ofendidu balun ne’ebé sente sai ona vítima ba nia hahalok, nune’e sira mai halo denúnsia no Polísia halo kedan monitorizasaun ba suspeitu nia hahalok.
Komandante João hakle’an, durante ne’e suspeitu A halo nia asaun liuhusi nia konta Facebook ho naran MMN.
Superintendente João dehan, suspeitu nu’udar membru ida husi empreza RAI MAKMOR ne’ebé mak bosok ema atu trata dokumentu.
“Ita konsidera ne’e fraglante delitu tanba dokumentu sira ne’ebé nia uza lori hodi trata ema-nia dokumentu hodi lansa informasaun falsu iha nia liman, ne’ebé ami agora asegura ona”, nia katak.
Polísia asegura evidénsia sira hanesan dokumentu sertidaun RDTL, BI kopia balun nomós Kartaun Eleitorál, dokumentu falsu sira ne’e nia uza lansa informasaun katak liuhusi nia dokumentu sira ne’e trata ho lalais iha tempu badak.
Nune’e mós, Polísia halo apreensaun ba motór ida-ne’ebé durante ne’e suspeitu uza hodi halo nia atividade .
Suspeitu bele hetan entre $20 to’o $100 husi nia kliente liuhusi nia atividade ilísitu ne’e.
Servisu Investigasaun Kriminál daudaun ne’e halo hela komunikasaun ho Ministeriu Públiku atu halo prosesu kontinuasaun ba suspeitu.
Biban ne’e, Diretór ne’e husu ba públiku ne’ebé atu trata dokumentu ofisiál Estadu nian hanesan BI, Pasaporte no seluk tan bele bá direta iha Notariadu.
“Karik ema ruma mak oferese-an atu trata dokumentu iha li’ur bele informa ba ami hodi ami halo atuasaun,” nia fó hanoin.
Jornalista : Natalino Costa
Editora : Julia Chatarina
