DILI, 11 Abríl 2026 (TATOLI)—Autoridade Inspesaun Fiskalizasaun Atividade Ekonómika no Sanitária Alimentár (AIFAESA) ezekuta ona 14% Orsamentu Jerál Estadu (OJE) 2026, hahú husi fulan-Janeiru to’o Marsu.
Inspetora Jerál AIFAESA, Odete Maria Viegas, hateten, ezekusaun ne’e kobre husi kategoria rua, saláriu no vensimentu inklui bens no servisu, enkuantu ezekusaun ba saláriu no vensimentu seidauk másimu nune’e persentajen seidauk sa’e.
“AIFAESA konsege rekolla koima hamutuk $200.620 iha trimestre dahuluk, hafoin halo inspesaun ba estabelesimentu hamutuk 3.000-resin ho kategoria indústria, komérsiu no turizmu iha kapitál Dili,” Inspetora informa ba Jornalista iha ninia knaar fatin, Matadoru, Sesta (10/04).
Notísia relevante : AIFAESA divulga informasaun kona-ba koima ba operadór ekonómiku sira ba Autoridade Dili
Nia hatutan, koima hirak ne’e barak liu rekolla husi empreza xineza sira, tamba fa’an produtu espiradu, estragadu no fatin ladun ijiéne, entaun sira tenke taka provizóriu atu kumpre rekezitu hafoin reativa fali sira-nia negósiu. Iha loja 20 mak reativa. Koima ne’ebé aplika hahú husi $500 to’o $5.000.
AIFAESA aloka osam hamutuk $2.025.015 iha tinan 2026, kompostu husi saláriu no vensimentu $1.137.768, bens no servisu $787.247 no kapitál menor $100.000.
Jornalista : Alexandra da Costa
Editora : Julia Chatarina
