DILI, 12 Abríl 2026 (TATOLI)—Estadu Unidus Amérika (EUA) no Iraun la konsege hetan akordu dame nian hafoin konversasaun sira ho risku aas iha kapitál pakistaneza, ho vise-prezidente JD Vance hatete katak Teeraun rekuza atu simu termu sira Washington nian hafoin konversasaun sira durante oras 21 iha Islamabad.
“Notísia aat maka ita seidauk hetan akordu ida, no ha’u hanoin katak ida-ne’e notísia aat ba Iraun liu fali notísia aat ba Estadus Unidus Amérika nian,” vise-prezidente JD Vance, xefe delegasaun EUA nian, hatete ba jornalista sira antes nia sai hosi Islamabad hafoin enkontru nivel aas liu entre Washington no Teeraun dezde revolusaun islámika 1977.
Haree JD Vance nia komentáriu kompletu hafoin konversa EUA-Iraun remata lahó akordu lista nia rohan Vance hatete katak Iraun hili “atu la simu ami-nia termu sira,” hodi hatutan katak EUA presiza haree “kompromisu fundamentál” ida hosi Teeraun hodi la dezenvolve arma nukleár sira.
“… Ita presiza haree kompromisu afirmativu ida katak sira sei la buka arma nukleár ida, no sira sei la buka ferramenta sira ne’ebé sei permite sira atu hetan lalais arma nukleár ida,” Vance hatete.
Ministru Negósiu Estranjeiru Iraun nian hatete iha loron-domingu katak laiha ema ida maka hein katak konversa sira ho EUA sei hetan akordu ida iha sesaun ida de’it.
“Naturalmente, dezde inísiu, ita labele hein atu hetan akordu iha sesaun ida de’it. Laiha ema ida maka iha espetativa hanesan ne’e”, dehan porta-vós ministériu nian, Esmaeil Baghaei, tuir emizora estatál IRIB.
Nia hatete katak Teeraun “fiar katak kontaktu sira entre ami ho Pakistaun, no mós ami-nia belun sira seluk iha rejiaun, sei kontinua”.
Apela ba kontinuasaun trégua
Pakistaun husu ba EUA no Iraun atu mantein sira-nia kompromisu ba sesarfogu no kontinua esforsu sira hodi hetan dame ida ne’ebé dura.
“Hodi Pakistaun nia naran, ha’u hakarak hato’o agradesimentu ba parte rua tanba apresia Pakistaun nia esforsu sira hodi hetan sesarfogu no nia papél mediadór. Ami hein katak parte rua kontinua ho espíritu pozitivu hodi hetan dame no prosperidade ne’ebé dura ba rejiaun tomak no liután,” hatete hosi Ministru Negósiu Estranjeiru Pakistaun nian, Ishaq Dar.
EUA no Israel lansa funu hasoru Iraun iha loron 28 fulan-Fevereiru ne’ebé habelar ba Médiu Oriente ne’ebé luan liu, ho Teeraun halo atake vingansa nian hasoru Izraél no nasaun viziñu sira Golfu nian ne’ebé simu ativu sira EUA nian. Ema liu 2.000 maka mate no área militár no sivíl sira hetan estragu iha atake sira entre EUA no Izraél hasoru Iraun.
Funu ne’e mós hamosu krize enerjétika globál ida hafoin Iraun tau estrangulasaun ida iha Estreitu Ormuz nian ne’ebé liuhosi esportasaun mina no gás mundiál pursentu 20-resin.
Delegasaun norte-amerikanu ne’ebé lidera hosi Vance no delegasaun iranianu ne’ebé lidera hosi Prezidente Parlamentu Mohammad Bagher Qalibaf diskute ona oinsá atu avansa sesarfogu ne’ebé ameasadu ona hosi dezentendimentu kle’an sira no atake sira ne’ebé kontinua hosi Izraél hasoru grupu Hezbollah iha Líbanu.
Notísia relevante: Funu EUA-Iraun: Pakistaun lidera negosiasaun sezarfogu
